ढेबेवाडी विभागातील अवैध व्यवसायांना पोलिसांचा चाप

ढेबेवाडी पोलीस ठाण्याचे कार्यक्षेत्र काढणे गावापासून पश्चिमेला शिराळा हद्दीपर्यंत पसरले आहे. जंगल आणि दऱ्या-खोऱ्यात विखुरलेल्या या विभागातील ग्रामस्थ मोठ्या प्रमाणात व्यवसाय आणि नोकरीसाठी शहराकडे स्थंलातरित होत आहेत. याच विभागात वांग मराठवाडी धरणग्रस्तांची आंदोलने, तर पवनचक्की कंपनीच्या दलालांची व गुंडांची दादागिरी सुरू असते. सर्वसामान्य शेतकऱ्यांच्या जमिनी बळकावत त्यांनी माजवलेली दहशत व गटातटाच्या राजकारणामुळे हा विभाग कायमच चर्चेत राहिला आहे.

गत अडीच वर्षात ढेबेवाडी विभागात अवैध व्यवसायांची विषवल्ली पसरली होती. पोलीस स्टेशन कार्यक्षेत्रातील परिसर वेगवेगळ्या गुन्ह्यांमुळे दहशतीखाली होता. रोडरोमिओंपासून ते गल्लीतील दादांची दहशत येथे पाय पसरू लागली होती. दोन वर्षांपूर्वी करपेवाडी येथील शाळकरी मुलीचा गळा चिरून खून झाला होता. मात्र तिचे मारेकरी पकडण्यात पोलिसांना अपयश आले. खळे येथे शाळेला येणाऱ्या मुलीवर हल्ला झाला होता, तर काही महिन्यांपूर्वी चोरट्यांनी ढेबेवाडी बाजारपेठेतील दुकाने लक्ष्य केली होती. त्या घटनेमुळे संपूर्ण ढेबेवाडी परिसर हादरला होता. लॉकडाऊनच्या काळात सर्वसामान्यांना नाहक त्रास दिल्याचा आरोपही ग्रामस्थ करत होते. याशिवाय लॉंकडाऊनमध्ये भागात दारू मोठ्या प्रमाणात आली होती. शिराळ्याकडून येणाऱ्या दारूच्या कारवाईमागील गौडबंगालाचीही मोठी चर्चा होती. त्यावेळी ढेबेवाडी पोलीस गांधारीच्या भूमिकेत होते.

सध्या नव्याने रुजू झालेले सहायक पोलीस निरीक्षक संतोष पवार यांनीही अवैध व्यवसायांची ही विषवल्ली मुळापासून उखडून टाकण्यासाठी पावले उचलायला सुरुवात केली आहे. ढेबेवाडी पोलीस ठाण्याचा कार्यभार स्वीकारताच ग्रामपंचायत निवडणुकीचा बिगुल वाजला. पोलीस स्टेशनच्या हद्दीतील २७ ग्रामपंचायतींच्या निवडणुकीची रणधुमाळी सुरू झाली. त्यातच पोलिसांनी केलेल्या आवाहनाला प्रतिसाद देत काही ग्रामस्थांनी ग्रामपंचायत निवडणुका बिनविरोध केल्या. त्यातूनही अवैध व्यवसायांना चाप लावण्यासाठी कारवायांचा धडाका सुरू केला.

- चौकट

गत दोन वर्षांपासून उसाचे ट्रक व ट्रॅक्टर रस्त्याच्या बाजूला उभे केले जायचे. त्यांच्यावर कारवाई करण्यास यापूर्वी पोलीस धजावत नव्हते. पोलिसांच्या नाकर्तेपणामुळे अपघातही घडले. अखेर रस्त्यानजीक ट्रॅक्टर-ट्रॉली धोकादायक स्थितीत उभ्या करणाऱ्यांवर सहायक पोलीस निरीक्षक संतोष पवार यांनी कारवाई करण्यास सुरुवात केली असून, अपघाताचे प्रमाणही कमी झाले आहे.

- चौकट

ग्रामपंचायत निवडणुकीत कायदा-सुव्यवस्था राखण्याबरोबरच अवैध व्यवसाय करणाऱ्या व अशा व्यवसायांना पाठीशी घालणाऱ्यांच्या मुसक्या आवळणार आहोत. विभागात कायदा, सुव्यवस्था रहावी, यासाठी आमचे प्रयत्न सुरू आहेत.

- संतोष पवार

सहायक पोलीस निरीक्षक, ढेबेवाडी