पाटणला महामार्गावर जीवघेणे खड्डे

कऱ्हाड-चिपळूण हा मार्ग पश्चिम महाराष्ट्रामधून कोकणला जाणारा जवळचा मार्ग आहे. या मार्गावरून पुणे, सातारा, कऱ्हाड, कोल्हापूर आणि सांगली या ठिकाणांहून अवजड वाहनांची कायम ये-जा सुरू असते. या मार्गाचे महत्त्व लक्षात घेता हा मार्ग राष्ट्रीय महामार्ग विभागाकडे हस्तांतरित करण्यात आला. आणि रस्त्याच्या चौपदरीकरणाला सुरुवात झाली. रस्त्याला राष्ट्रीय महामार्गाचा दर्जा मिळाल्यामुळे आणि तातडीने चौपदरीकरण सुरू झाल्यामुळे तालुक्याचा विकास होणार, या आशेने जनतेच्या आशा पल्लवित झाल्या. मात्र, अद्यापही रस्त्याचे काम पूर्ण झालेले नाही. त्यातच या मार्गावर पाटण येथे एसटी बसस्थानकानजीक मोठमोठे खड्डे पडले आहेत. या खड्ड्यांत अनेक वाहने आदळून अपघात होत आहेत. तसेच वाहनांचेही नुकसान होत आहे. या मार्गावरून सामान्य जनतेसह मंत्री, प्रांताधिकारी, तहसीलदार, गटविकास अधिकाऱ्यांसह वेगवेगळ्या पक्षांच्या लोकप्रतिनिधींची वर्दळ असते. मात्र, जीवघेणे ठरणारे हे खड्डे बुजविण्याबाबत संबंधित विभागाला अद्यापही कुणी सूचना दिलेली नाही, हे दुर्दैव.

- चौकट

विकासाऐवजी निर्माण झाल्या समस्या

कऱ्हाड-चिपळूण रस्त्याचे रुंदीकरणाचे काम सुरू होऊन दोन वर्षे उलटली. मात्र, अद्यापही काम पूर्णत्वास गेले नाही. रस्त्याचे काम रेंगाळल्यामुळे जनतेत नाराजी आहे. या रस्त्याच्या चौपदरीकरणामुळे तालुक्याचा विकास होईल, अशी अपेक्षा असताना विकासाऐवजी समस्याच निर्माण झाल्या.

फोटो : ०७केआरडी०२

कॅप्शन : कऱ्हाड ते चिपळूण मार्गावर पाटण येथील बसस्थानकानजीक मोठ्या प्रमाणावर खड्डे पडले असून वाहने याठिकाणी आदळून अपघात होत आहेत. (छाया : प्रवीण जाधव)