‘राजें’मध्ये रंगले ‘फलक’ युद्ध !

सातारा : सातारा पालिकेचा गढ काबीज करण्यासाठी खासदार उदयनराजे भोसले व आमदार शिवेंद्रसिंहराजे भोसले यांनी विकासकामांचा धडका सुरू केला असतानाच दोन्ही राजेंमध्ये सुरू असलेल्या ‘वाक्’युद्धाने राजधानीचे वातावरण चांगलेच ढवळून निघाले आहे. याची आणखी एक झलक बुधवारी सातारकरांना पाहायला मिळाली. पोवई नाक्यावर दोन्ही राजेंच्या समर्थकांकडून एकाच कामाचे दोन फलक लावण्यात आले. हे फलक अन् कामावरून सुरू झालेला श्रेयवाद सातारकरांच्या चर्चेचा विषय ठरला.

नगरपालिकेची निवडणूक जवळ आल्याने जिल्ह्यातील सर्वच पालिकांमध्ये राजकीय घडामोडींना ऊत आला आहे. मात्र, सातारा पालिकेसाठी सुरू असलेल्या घडामोडी जिल्ह्याचे लक्ष वेधून घेत आहेत. दोन्ही राजे भाजपवासी असले तरी पालिकेची निवडणूक ते स्वतंत्र आघाड्यांमधून लढणार, हे निश्चित मानले जात आहे. त्यामुळे उदयनराजे यांनी यंदाही पालिकेवर वर्चस्व मिळविण्यासाठी, तर शिवेंद्रसिंहराजे यांनी गेल्या निवडणुकीतील पराभवाची सल भरून काढण्यासाठी प्रतिष्ठा पणाला लावली आहे.

पहिल्या टप्प्यात दोन्ही राजेंनी नागरिकांच्या मूलभूत प्रश्नांकडे लक्ष केंद्रित केले असून, विकासकामांचा धडाका सुरू केला आहे. याच पार्श्वभूमीवर बुधवारी खा. उदयनराजे यांनी पोवई नाका ते वाढे फाटा चौक या रस्त्याच्या चौपदरीकरणाच्या कामाचा लव्याजम्यासह नारळ फोडला. कार्यक्रमानंतर पोवई नाक्यावर या कामाचा भला मोठा फलकही लावण्यात आला. मात्र, आमदारांच्या समर्थकांना हा फलक काही पचनी पडला नाही. त्यांच्या समर्थकांनी काही वेळातच याच फलकाशेजारी ‘काम कोणाचं... नाचतंय कोण... कधीतरी खरं बोला’ अशा आशयाचा दुसरा फलक लावला. सोशल मीडियाच्या माध्यमातून हे दोन्ही फलक सर्वत्र व्हायरल झाले अन् चर्चेला उधाण आले.

एकाच कामासाठी दोन वेळा निधी कसा मंजूर झाला, एकाच कामाचा दोनदा नारळ फुटतो कसा? अशा असंख्य प्रश्नांचेे काहूर सातारकरांच्या मनात माजले; पण नेहमीप्रमाणे सातारकांनी ही गोष्ट काही गांभीर्याने घेतली नाही. निवडणुका जवळ आल्या की, हे असेच होते. पुढेही होत राहील. श्रेय कोणी घ्यावे हा ज्याचा-त्याचा प्रश्न; पण लोकोपयोगी कामे होतायत हे महत्त्वाचे आहे, असे सांगून सातारकरांनी ‘फलका’वरून सुरू असलेल्या चर्चेला पूर्णविराम दिला. असे असले तरी राजधानीचे राजकीय वातावरण हळूहळू तापू लागले आहे, हे निश्चित.

(चौकट)

निधीसाठी दोघांचाही

गडकरींकडे पाठपुरावा

केंद्रीय रस्ते वाहतूक आणि परिवहनमंत्री नितीन गडकरी यांच्याकडे केलेल्या पाठपुराव्यामुळे वाढे फाटा ते पोवई नाका रस्त्याच्या चौपदरीकरणासाठी १४ कोटी ७२ लाखांचा निधी मंजूर झाल्याचे आ. शिवेंद्रसिंहराजे भोसले यांनी दोन महिन्यांपूर्वी जाहीर केले होते. बांधकाम विभागाच्या अधिकाऱ्यांसमवेत चौपदरीकरणाच्या कामाचा त्यांनी आढावादेखील घेतला होता, तर खा. उदयनराजे भोसले यांनीदेखील मंत्री नितीन गडकरी यांच्याकडे सातत्याने केलेल्या पाठपुराव्यामुळे चौपदरीकरणासाठी १४ कोटी ७२ लाखांच्या कामास प्रशासकीय मान्यता मिळाल्याचे स्पष्ट केले आहे. लवकरच पोवई नाका ते वाढे फाटा या रस्त्याचा कायापालट होणार असल्याची घोषणादेखील बुधवारी विकासकामांच्या उद्घाटनावेळी केली.

फोटो : २२ पोवई नाका