दरम्यान, नांदलापुरात सरपंचपद अनुसूचित जातीच्या पुरुषासाठी आरक्षित आहे. निवडून आलेल्यांमध्ये या प्रवर्गातील कोणीही उमेदवार नसल्यामुळे पद रिक्तच राहिले; तर आमदार पृथ्वीराज चव्हाण गटाचे मानसिंग लावंड यांची उपसरपंचपदी निवड झाली आहे.
कऱ्हाड तालुक्यातील आदर्श गाव म्हणून ओळख असलेल्या जखीणवाडीच्या निवडणुकीत बिनविरोधाला फाटा देत सर्व ११ जागांवर निवडणूक झाली. उंडाळकर, चव्हाण गट विरुद्ध भोसले गटातच मुख्य लढत झाली. त्यामध्ये गावपातळीवरील राजकारणाची झलक पाहायला मिळाली. या चुरशीच्या लढतीत रामचंद्र पाटील व अ‍ॅड. नरेंद्र पाटील यांच्या नेतृत्वाखालील पॅनेलने ११ पैकी ७ जागा जिंकत अनेक वर्षांपासूनची सत्ता अबाधित ठेवली; तर विरोधी डॉ. अतुल भोसले गटाला जागा जागा मिळाल्या. निवडणूक निकालानंतर सरपंच निवडीपर्यंत गावात बऱ्याच राजकीय घडामोडी घडल्या. या घडामोडींत अनेक वर्षांचा अनुभव असलेल्या अ‍ॅड. नरेंद्र पाटील यांनी सरपंचपद ‘ओपन’ असूनही महिलांना संधी देण्याचा निर्णय घेतला. पदाची संधी सर्वांना मिळावी म्हणून ग्रामविकास पॅनेलच्याच शोभा नलवडे सरपंच, तर शंकर झिमरे यांची उपसरपंचपदी निवड करण्यात आली.
नांदलापूर ग्रामपंचायतीत नऊ सदस्यसंख्या असून त्यापैकी गोपाळवस्तीतील एक महिला बिनविरोध निवडून आली होती. उर्वरित आठ जागांसाठी मतदान झाले. या निवडणुकीत पक्षीय राजकारणाला बगल देत भावकी व गावपातळीवरील राजकारणाला प्राधान्य दिले. विलास शिर्के, मानसिंग लावंड व प्रदीप शिर्के या माजी सरपंचांच्या नेतृत्वाखाली निवडणूक झाली. आठ जागांपैकी विलास शिर्के यांना ३, मानसिंग लावंड यांना ३ व प्रदीप शिर्के यांना २ जागांवर विजय संपादन करता आला. साधारणत: नांदलापुरात मानसिंग लावंड व प्रदीप शिर्के हे उंडाळकर व आमदार पृथ्वीराज चव्हाण यांना मानणारे आहेत; तर विलास शिर्के यांच्यासह बिनविरोध निवडून आलेले हे डॉ. अतुल भोसले यांच्या गटाचे आहेत. नांदलापूरचे सरपंचपद हे अनुसूचित जाती पुरुषासाठी आरक्षित आहे. मात्र निवडून आलेल्यांमध्ये या प्रवर्गातील कोणीही नसल्यामुळे पद रिक्तच राहिले; तर उपसरपंच म्हणून आमदार चव्हाण गटाचे मानसिंग लावंड यांची निवड झाली आहे.
- चौकट
गोळेश्वरमध्ये चंद्रकांत काशीद सरपंच
गोळेश्वर ग्रामपंचायत निवडणुकीत पक्षीय पातळी बाजूला ठेवत गावपातळीवर भावकी व वाडीवस्तीवर आधारित निवडणूक झाली. सोयीनुसार एकत्र येऊन शिवशंभो ग्रामविकास पॅनेलचे चंद्रकांत काशीद सरपंच, तर प्रकाश जाधव यांची उपसरपंच म्हणून निवड करण्यात आली.