शिरवळ : शिरवळ बसस्थानकातील स्वच्छतागृहात सुलभ शौचालय चालकाचा गळा आवळून डोके आपटत खून करण्यात आला. रणजित गणपतराव जाधव (वय ४०, रा. बौद्ध आळी, शिरवळ) असे खून झालेल्या व्यक्तीचे नाव आहे. ही घटना शुक्रवारी सकाळी साडेसहाच्या सुमारास उघडकीस आली.
घटनास्थळ व शिरवळ पोलिसांनी दिलेली माहिती अशी की, शिरवळ येथील रणजित जाधव यांनी बसस्थानकातील स्वच्छतागृह चालविण्याकरिता घेतले आहे. गुरुवार, दि. १९ रोजी रणजित जाधव हा स्वच्छतागृहाच्या याठिकाणी होता. तेव्हा त्याठिकाणी अज्ञात दोघांबरोबर रणजित जाधव यांची वादावादी झाली. वादावादीत संबंधितांनी रणजित जाधव याचा गळा आवळत डोके आपटले. यामध्ये रणजित गंभीर जखमी झाला. यातच त्याचा जागीच मृत्यू झाला. मृत रणजित जाधव याचा गळा, चेहरा, खांद्यावर जखमाचे व्रण होते.
याबाबत माहिती मिळताच फलटणचे उपविभागीय पोलीस अधिकारी तानाजी बरडे, वाईचे उपविभागीय पोलीस अधिकारी शीतल जानवे-खराडे, शिरवळचे पोलीस निरीक्षक महेश इंगळे, सातारा स्थानिक गुन्हे शाखेचे सहायक पोलीस निरीक्षक आनंदसिंग साबळे, पोलीस उपनिरीक्षक वृषाली देसाई यांच्यासह पोलीसांनी घटनास्थळी धाव घेतली.
मृत रणजित जाधव याच्या मृतदेहाचे शवविच्छेदन शिरवळ येथील प्राथमिक आरोग्य केंद्र याठिकाणी करण्यात येऊन मृतदेह नातेवाइकांच्या ताब्यात देण्यात आला आहे. घटनास्थळी सातारा येथील रिओ श्वानाला व ठसेतज्ज्ञांना पाचारण करण्यात आले होते. एका संशयिताला चौकशीकरिता सातारा स्थानिक गुन्हे अन्वेषण विभाग व शिरवळ पोलीस यांनी ताब्यात घेतले आहे. संजय जाधव यांनी शिरवळ पोलीस ठाण्यात फिर्याद दिली आहे. शिरवळचे पोलीस निरीक्षक महेश इंगळे तपास करीत आहे.
फोटो रणजित जाधव