मुलासह दाम्पत्य कऱ्हाडातून बेपत्ता

एक वर्षाच्या बालकासह --याप्रकरणी गूढ वाढले आहे.

कराड : लिंंब, ता. तासगाव येथील दाम्पत्य एक वर्षाच्या बालकासह कऱ्हाडमधून बेपत्ता झाल्याची तक्रार शहर पोलीस ठाण्यात नोंद करण्यात आली असून, याप्रकरणी गूढ वाढले आहे. श्रीधर ऊर्फ दीपक दादासाहेब पाटील (वय ३१), अर्चना श्रीधर पाटील (वय २१) व विराट श्रीधर पाटील (वय १, सर्वजण रा. लिंंब), अशी बेपत्ता झालेल्यांची नावे आहेत. पोलिसांनी दिलेल्या माहितीनुसार, श्रीधर पाटील हे पत्नी अर्चना व एक वर्षाचा मुलगा विराट यांना सोबत घेऊन त्यांच्या कारमधून (एमएच १० बीबी ४८५२) २० नोव्हेंबर रोजी सकाळी ११ वाजता कऱ्हाड येथील करमरकर हॉस्पिटलमध्ये जातो, असे सांगून घरातून निघून गेले. त्यांनतर त्याच दिवशी सायंकाळी सात वाजण्यापूर्वी त्यांचे कऱ्हाड येथील त्यांचे भाऊ राहत असलेल्या इमारतीच्या पार्किंगमध्ये श्रीधर पाटील यांनी आणलेली कार पार्क केली होती. त्याची चावी फ्लॅटमधील खिळ्यास अडकवून ठेवण्यात आली होती. त्यानंतर श्रीधर पाटील, त्यांची पत्नी अर्चना व मुलगा विराट अद्याप घरी परतले नाहीत. त्यांचा सर्वत्र शोध घेऊनही तिघे सापडले नाहीत. त्यामुळे ते बेपत्ता झाले आहेत, अशी फिर्याद उत्तम नारायण पाटील यांनी पोलिसांत दिली आहे. याबाबत कराड शहर पोलीस ठाण्यात नोंद झाली आहे. (प्रतिनिधी)