पश्चिमेकडील अनेक डोंगर गवत चाऱ्याने भरलेलेच

बामणोली : यावर्षी दिवाळीपर्यंत सुरू राहिलेला पाऊस व जिल्ह्याच्या पश्चिम भागात कमी झालेले पशुधन यामुळे बहुतेक डोंगररांगा गवतचाऱ्याने भरलेल्याच आहेत. गाई, म्हशी असलेल्यांनी गवताच्या गंजी लावून ठेवल्या आहेत. त्यामुळे त्यांची चिंता मिटली आहे. कोणाला आवश्यकता असेल तर गवत चारा स्वत: कापून नेण्याचे आवाहन केले आहे.

पाटण तालुक्यातील कोयनानगर, नवजापासून ते वासोटा महाबळेश्वर, वाई, मांढरदेवीच्या डोंगरांपर्यंत तसेच साताऱ्याच्या बोगद्यापासून कास, बामणोली तापोळ्यापर्यंत मोठ्या प्रमाणात गवत शिल्लकच आहे. चारा कापून दुसरीकडे पाठविला तर लाखो ट्रक चारा गोळा होईल. मात्र, वणवा लागला तर वणव्याबरोबर हजारो झाडेझुडपे व सूक्ष्म जीव, जंगली पशुपक्षी यांची जीवितहानी होईल. याची भीती ग्रामस्थ व शेतकऱ्यांना सतावत आहे. अनेकांची गवताची कुरणे व रान, डोंगर घरांच्या शेजारीच आहेत. त्यामुळे डोंगराबरोबर घराजवळील व रस्त्याकडील झाडाझुडुपांनाही धोका पोहोचणार आहे. त्यामुळे गरजू लोकांना आपल्या डोंगरातील गवत चारा येऊन मोफत कापून घेऊन जाण्याचे आवाहन अनेक शेतकरी करीत आहेत.

कोट .क्र.१

रानडुक्कर, साळींदर, रानगवे, भेकर, वानर आणि माकडांच्या त्रासाला कंटाळून आमच्या भागातील लोकांनी शेतीच करणे सोडून दिले. उपजीविकेचे साधनच संपले. भूमिपुत्र चाकरमानी झाले. परिणामी पशुधन संपले. शेतजमीन आणि डोंगरदऱ्या गवताची कुरणे बनली. मात्र, हेच गवत वणव्याने जळून निसर्गाची हानी होते. यावर उपाय म्हणून कागद कारखान्यांनी व पर्यावरण विभागाने पुढाकार घेण्याची आवश्यकता आहे.

- दिलीप शिंदे,

शेतकरी, सावरी, ता. जावली

कोट

साताऱ्यापासून चार किलोमीटर अंतरावर यवतेश्वर गावात शेतजमीन आहे. येथे कास-बामणोली रस्त्यालगत मुबलक गवत चारा शिल्लक आहे. लोकांनी येऊन मोफत कापून घेऊन जावे. आमच्या गावच्या मागील बाजूस संपूर्ण गावच्या मालकीचा खंडू माळाचा डोंगर पूर्णपणे गवताने भरलेला आहे. या एका डोंगरातच पाचशेपेक्षा जास्त ट्रक गवत मिळेल. गरजू लोकांनी येऊन घेऊन जावे..

- यशवंत साळुंखे,

शेतकरी, यवतेश्वर

फोटो :

०२बामणोली-चारा

साताऱ्याच्या पश्चिमेला असलेल्या डाेंगरात मोठ्या प्रमाणावर गवत शिल्लक आहे. ते मोफत घेऊन जाण्याचे आवाहन केले जात आहे. (छाया : लक्ष्मण गोरे)