वरकुटे-मलवडी : माण तालुक्यातील काळचौंडी गावच्या सरपंचपदी राणी भाऊ माने, तर उपसरपंचपदी अर्चना आबा कोरे यांची सर्वानुमते बिनविरोध निवड करण्यात आली. यावेळी ग्रामपंचायत सदस्य विमल हांडे, लक्ष्मी सावंत, ऊर्मिला कुंभार, अर्चना जाधव, सारिका केंगार, सुवर्णा तिवाटणे, विजया माने, सर्व महिला ग्रामपंचायत सदस्या उपस्थित होत्या.
माण तालुक्याच्या इतिहासात पहिल्यांदाच कुकुडवाड गटातील काळचौंडी गावच्या ग्रामपंचायतीवर सर्व महिला सदस्यांचेच राज्य प्रस्थापित झाले आहे. पक्ष, पार्टी, गट, तट बाजूला ठेवून गावच्या विकासासाठी कसलेही हेवेदेवे न बाळगता काळचौंडीच्या ग्रामस्थांनी मोठ्या मनाने महिलांच्या हाती गावचा कारभार सोपवला आहे. काळचौंडी ग्रामपंचायत कार्यालयात आयोजित केलेल्या सरपंच निवडणुकीचे निवडणूक निर्णय अधिकारी म्हणून डी.बी. शिंदे व ग्रामसेवक मल्हारी खाडे यांनी काम पाहिले. यावेळी दोन्ही गटांचे प्रमुख माजी सरपंच बाळासाहेब माने व बाळासाहेब माने, पोलीस पाटील संध्याराणी माने, पोलीस काॅन्स्टेबल नंदकुमार खाडे आदी मान्यवर उपस्थित होते. निवडीनंतर सरपंच, उपसरपंच यांंचा सत्कार करण्यात आला, तर सर्व महिला सदस्यांनी एकमेकींना पेढा भरविला. कार्यकर्त्यांनी गुलालाची उधळण करीत आनंद व्यक्त केला. सर्व निवडणूक प्रक्रिया शांततेत व बिनविरोध पार पडल्याने काळचौंडी ग्रामस्थांतून कौतुक होत आहे.
२४काळचौंडी
फोटो : काळचौंडी ग्रामपंचायतीच्या निवडीनंतर ग्रामपंचायत कार्यालयासमोर महिला सदस्यांनी आनंदोत्सव साजरा केला.