रुग्णालयाला ताळा.. बाळंतिणीला मरण‘कळा’!

बिबी आरोग्य केंद्राचा कारभार : नाईलाजाने दुसऱ्या दवाखान्यात जाताना रुग्णवाहिकेतच प्रसूती

सूर्यकांत निंबाळकर ल्ल आदर्की
रात्री एक वाजता बाळंतकळा सुरू झाल्याने कुटुंबीयांनी तिला प्राथमिक आरोग्य केंद्रात नेले; पण रुग्णालयाला कुलूप! असह्य वेदनांनी ती तडफडत होती. वडील डॉक्टरांना फोन लावून थकले. प्रतिसाद मिळत नव्हता. अखेर १०८ नंबर लावला अन् रुग्णवाहिका आली. दुसऱ्या रुग्णालयात जात असताना वाटेतच तिची सुखरूप सुटका झाली अन् सर्वांनी सुटकेचा निश्वास टाकला. ही घटना आहे फलटण तालुक्यातील बिबी येथील. दरम्यान, येथील आरोग्य केंद्राच्या कारभाराबाबत संताप व्यक्त होत आहे.
शासन जननी सुरक्षा योजनेच्या माध्यमातून गरोदर मातांना शासकीय रुग्णालयात बाळंतपण करण्यासाठी प्रोत्साहित करत आहे. त्यासाठी संबंधित मातेला अनुदान दिले जाते. शिवाय मोफत रुग्णवाहिकेचीही सोय पुरविली जाते. ग्रामीण भागातील महिला बाळंतपणासाठी शासकीय रुग्णालयातच जातात. मात्र, तरीही डॉक्टरांच्या हलगर्जीपणामुळे, गैरहजेरीमुळे शासनाच्या या उद्देशाला खो बसत असल्याचे फलटण तालुक्यातील बिबी प्राथमिक आरोग्य केंद्रात घडलेल्या प्रकारावरून सिद्ध झाले आहे.
बिबी येथील ऊर्मिला वर्पे हिच्या पोटात दुखू लागल्यामुळे तिचे वडील बाबासो पवार व कुटुंबातील महिलांनी तिला येथील प्राथमिक आरोग्य केंद्रात रात्री एक वाजता उपचारासाठी घेऊन गेले. त्यावेळी दवाखान्याला कुलूप होते. म्हणून वैद्यकीय अधिकारी
डॉ. खताळ यांना मोबाईलवरून संपर्क साधला पण प्रतिसाद मिळाला नाही. आई-वडील दोघेही रुग्णालयात मोठ्या हाका मारल्या तरीही कुणी आले नाही.
ऊर्मिला रुग्णालयाच्या व्हरांड्यात वेदनेने विव्हळत होती. अखेर तिचे वडील बाबासो पवार यांनी १०८ नंबरवर फोन केला अन् सगळा प्रकार सांगितला. काही वेळातच रुग्णवाहिका आली. ऊर्मिलाला फलटण येथे घेऊन जात असताना तिला वेदना असह्य होऊ लागल्या. रुग्णवाहिकेसोबत असलेले डॉ. अडसूळ यांनी गाडी बाजूला उभी करायला लावली.
अशातच ऊर्मिलाची गाडीमध्येच प्रसूती होऊन तिला कन्यारत्न झाले.
वाटेतच रुग्णवाहिकेत प्रसूत झालेल्या ऊर्मिलाला पुढील उपचारासाठी फलटण येथील रुग्णालयात नेले. परंतु बिबी आरोग्य केंद्रातील आरोग्य अधिकारी, कर्मचाऱ्यांच्या बेजबाबदारपणा
तसेच लोकप्रतिनिधींचे दुर्लक्ष याबाबत सर्वत्र संताप व्यक्त होत आहे.