राधाकृपा आश्रमाकडून साहित्य भेट

कुडाळ : जावळी तालुक्यातील ५९ शाळांमधील सुमारे १७९८ विद्यार्थ्यांना राधाकृपा आश्रमच्या ब्रजांचल चॅरिटेबल ट्रस्ट भोसे, मुंबई यांच्या वतीने शालोपयोगी साहित्य व खाऊ देण्यात आला. कोरोनामुळे दरवर्षीप्रमाणे प्रत्यक्ष वाटप न करता सर्व शाळांवर साहित्य पोहोचवता आले. यामुळे विद्यार्थी, शिक्षक आणि पालक यांच्याकडून ट्रस्टबाबत ऋणानुभाव व्यक्त होत आहे.

शिक्षक समितीचे महाबळेश्वर तालुकाध्यक्ष भाऊसाहेब दानवले, जावळी शिक्षक पतसंस्था चेअरमन धिरेश गोळे यांच्या माध्यमातून जावळी तालुक्यातील शाळांना अनेक वर्षांपासून या मदतीचा लाभ मिळत आहे. दरवर्षीप्रमाणे भोसे या ठिकाणी ब्रजांचल चॅरिटेबल ट्रस्टच्या वतीने विद्यार्थ्यांकरिता साहित्य व खाऊ वाटप करण्यात येतो. यावर्षी मात्र कोरोनाच्या महामारीमुळे कार्यक्रम रद्द करण्यात आला. ट्रस्टच्या वतीने प्रत्यक्ष शाळेवर जाऊन साहित्य पोहोच करण्यात आले. यासाठी विश्वस्त माता ब्रजदेवी, संत प्रेमधन ठाकूरजी, स्वामीजी कृष्णदास ब्रजदेवी यांनी मोलाचे योगदान लाभले.