महामार्गावर बिबट्याचा पंधरा मिनिटे ठिय्या

आगाशिव डोंगराभोवतीच्या गावात अनेकवेळा बिबट्याने प्राणी ठार केले आहेत. गत काही महिन्यांत चचेगाव, आगाशिवनगर, जखीणवाडी, धोंडेवाडी, नांदलापूर शिवारात शेतातील वस्तीवरील शेळ्या ठार केल्या आहेत. त्यामुळे या परिसरात किमान महिन्यात तीन-चारवेळा बिबट्याचा हल्ला होण्याचे समीकरणच झाले आहे. काही ठिकाणी झालेला हल्ला हा एका बिबट्याचा नसून, जास्त बिबट्यांचा असावा, असा अंदाज वनविभागाने अनेकवेळा वर्तविला होता.

काही दिवसांपूर्वी जखीणवाडी, चचेगाव येथील टाकेवस्तीनजीक ढेबवस्तीवर, आगाशिवनगर येथील पवार वस्तीवर हल्ला करत त्याने शेळ्या ठार केल्या होत्या. धोंडेवाडीतील लिक नावाच्या शिवारात म्हैस ठार केली होती. दुसऱ्याच दिवशी काले येथील शेतकऱ्यांना बंद कंपनीच्या परिसरात भरदिवसा बिबट्या फिरत असल्याचे दिसले होते. डोंगरभागात बिबट्याचा सततचा वावर पाहता परिसरातील शेतकरी रानात जाण्यासाठी धजावत नाहीत. काही दिवसांपूर्वी साडेनऊ वाजण्याच्या सुमारास काले येथील संतोष पाटील यांच्यासह कुटुंबातील सदस्य घरात होते, तर दारात बसलेल्या पाळीव श्वानावर हल्ला करण्यासाठी बिबट्या तेथे आला होता. मात्र, श्वानाने केलेल्या गोंधळामुळे व भुंकण्याने बिबट्याने धूम ठोकली.

मंगळवारी रात्री अकरा वाजण्याच्या सुमारास पाचवडफाटा येथे महामार्ग ओलांडताना अज्ञात वाहनाची धडक बसल्यावर बिबट्याने महामार्गावरच ठिय्या मारला. तब्बल पंधरा मिनिटे तो एका जागेवरच बसून होता. बिबट्याला पाहण्यासाठी मोठी गर्दी झाली होती. जमलेल्या नागरिकांनी पोलिसांसह वनविभागाला खबर दिली. वनविभागासह पोलीस घटनास्थळी दाखल झाले. मात्र, तोपर्यंत बिबट्याने उसाच्या रानात धूम ठोकली. यावेळी महामार्गावर वाहतूक कोंडी झाली होती. भरवस्तीत वावर वाढल्यामुळे बिबट्याची चांगलीच दहशत निर्माण झाली आहे.

- चौकट

वाहनांची वर्दळ सुरूच

महामार्गावर बिबट्याने ठाण मांडलेले असताना त्याठिकाणी बघ्यांची मोठी गर्दी झाली होती. त्यातच महामार्गावरून वाहनांची रहदारीही सुरू होती. एकीकडे बघ्यांची गर्दी, तर दुसरीकडे वाहनांची वर्दळ यामुळे काही वेळानंतर बिबट्या बिथरला. त्याने गतीने महामार्ग ओलांडून उपमार्गावरून थेट उसाच्या फडात झेप घेतली. क्षणार्धात तो दिसेनासा झाला.