लोकमत न्यूज नेटवर्क
रहीमतपूर : कोरेगाव तालुक्यातील साप येथील सोनारसिद्ध मंदिर परिसरातील धोम डावा कालव्यावरील वाहतुकीसाठी वापरल्या जाणाऱ्या पुलाच्या खालील स्लॅबच्या लोखंडी सळया तुटल्या आहेत. त्यामुळे खचला असून, पूल पडण्याचा धोका निर्माण झाला आहे. गेले वर्षभर पाटबंधारे विभागाचे दुर्लक्ष होत आहे.
साप येथील डोंगराकडे जाणाऱ्या सोनारसिद्ध मंदिर परिसरातील पावक्ता नावाच्या शिवारातील धोम डाव्या कालव्यावरील महत्त्वाचा असणारा पूल वाहतुकीसाठी धोकादायक बनला आहे. गेले वर्षभर अनेकदा वरूनच हा पूल खचत होता; परंतु या रस्त्यावरून ये-जा करणारे शेतकरी तात्पुरता मुरमाचा भराव टाकून वाहतुकीची गैरसोय दूर करीत होते. पाटबंधारे विभागाकडून गेली दोन वर्षे धोम डाव्या कालव्यावरील इतर ठिकाणचे दुरुस्तीचे काम सुरू आहे. कालवा दुरुस्तीच्या नावाखाली लाखो रुपये खर्च करण्यात आले आहेत; परंतु वाहतुकीसाठी धोकादायक बनलेल्या या पुलाची पाहणी करून तातडीने नवीन पूल उभारावा याकडे जाणीवपूर्वक दुर्लक्ष केल्याचा आरोप शेतकरी करीत आहेत.
या धोकादायक पुलावरूनच दररोज उसाने भरलेली वाहने जातात. शेतीमालाची वाहतूक याच रस्त्यावरून नेहमी होते. अचानक पूल कोसळल्यास आर्थिक नुकसानीबरोबरच वाहनधारकांच्या जिवालाही धोका निर्माण होऊ शकतो. धोम डावा कालव्याला पाणी येण्यापूर्वी या पुलाचे काम होणे गरजेचे आहे. पाणी आल्यानंतर पूल कोसळल्यास इतर ठिकाणी कालवा फुटून मोठे नुकसान होण्याची शक्यता आहे.
२०१८ मधील मे महिन्यामध्ये साप येथीलच धनगर शेत नावाच्या शिवारातील ओढ्यावरील पूल कालव्याला पाणी आल्यानंतर फुटला होता. त्यावेळी मोठ्या प्रमाणात पाणी वाया गेले होते, तसेच मोठे नुकसानही झाले होते. पाटबंधारे विभागाकडून कालव्याकडे दुर्लक्ष होत असल्यामुळेच वारंवार कालवा फुटीच्या घटना घडत असून, तातडीने धोकादायक पुलाच्या ठिकाणी नवीन व दर्जेदार पुलाची उभारणी करावी, अशी मागणी शेतकऱ्यांतून होत आहे.
चौकट :
लवकरच काम सुरू...
पाटबंधारे विभागाच्या शाखा क्रमांक तीनचे शाखा अभियंता बी. आर. जाधव यांच्याशी संपर्क साधल्यावर त्यांनी धोम डावा कालव्यावरील धोकादायक असलेल्या पुलाच्या उभारणीला येत्या दोन-तीन दिवसांत सुरुवात करणार असल्याचे सांगण्यात आले.
फोटो दि.३० रहीमतपूर पूल फोटो...
फोटो ओळ : साप, ता. कोरेगाव येथील धोम डावा कालव्यावरील धोकादायक पुलाच्या स्लॅबच्या लोखंडी सळया तुटल्या आहेत. यामुळे धोका निर्माण झाला आहे. ( छाया : जयदीप जाधव)
---------------------------