कोरेगाव रेल्वे मालधक्कासाठी प्रयत्न करणार : मुळे

कोरेगाव : ‘कोरेगाव हे व्यापारी केंद्र असून, साताऱ्यासह लगतच्या सोलापूर जिल्ह्यातील शेतकरी आणि व्यापाऱ्यांच्या सोयीसाठी कोरेगाव रेल्वे स्थानक परिसरात मालधक्का होणे आवश्यक आहे. त्यासाठी प्रयत्न सुरु आहेत,’ अशी माहिती पुणे विभागीय रेल्वे सल्लागार समितीचे सदस्य भरत मुळे यांनी दिली.

मुळे यांनी शुक्रवारी दुपारी भाजपच्या पदाधिकारी व कार्यकर्त्यांसमवेत कोरेगाव रेल्वे स्थानकाला भेट देऊन पाहणी केली. यावेळी वरिष्ठ स्थानक प्रबंधक भरतलाल मीना व प्रदीप फाळके यांनी त्यांचे स्वागत केले. रेल्वेच्यावतीने सुरु असलेल्या प्रकल्पांची माहिती फाळके यांनी दिली. मुळे म्हणाले, ‘कोरेगावसाठी रेल्वेने सुविधा वाढविणे गरजेचे आहे. रेल्वेकडे मुबलक जागा असल्याने मालधक्क्यासह जलद गाड्यांना थांबा मिळावा. पुणे - मिरज - कोल्हापूर दरम्यान जलद पॅसेंजर सुरू करावी व तिला कोरेगावात थांबा देण्यात यावा, रेल्वे कॅन्टिनधारकांप्रमाणेच फेरीवाल्यांची वैद्यकीय तपासणी करावी व मगच त्यांना विक्री परवाना द्यावा, कचरा व्यवस्थापन फेरीवाल्यांनी स्वत: करावे यासाठी संबंधितांना समज द्यावी, आदी सूचना लवकरच होणाऱ्या विभागीय सल्लागार समिती सभेत करणार आहे.’

यावेळी झालेल्या चर्चेत अमोल भूतकर, बबन कांबळे, श्रेयस काणे यांनी भाग घेतला. यावेळी भाजपचे तालुकाध्यक्ष संतोष जाधव, महिला आघाडी तालुकाध्यक्षा उज्ज्वला निकम, उपाध्यक्षा सुषमा निकम, भाऊ मतकर, राजेंद्र मतकर, जवानसिंग घोरपडे, महेश वडगावी यांच्यासह मान्यवर उपस्थित होते.

चौकट :

महाराष्ट्र एक्सप्रेसला सवलत द्या

रेल्वेने कोरोनामुळे आरक्षण व्यवस्थेत बदल केला आहे, तो समाधानकारक आहे. मात्र, गोंदिया-कोल्हापूर दरम्यान धावणाऱ्या महाराष्ट्र एक्सप्रेसचे बुकिंग एक्सप्रेस सुरु झाल्यानंतरसुद्धा पुण्यापासून कोल्हापूरपर्यंत करता येण्यासाठी संगणकीकृत बुकिंग सेवा उपलब्ध करावी. एक्सप्रेस सुटण्यापूर्वी बुकिंग बंद केले जाते, मात्र ही एक्सप्रेस दुसऱ्या दिवशी पुण्यापासून कोल्हापूरपर्यंतचा प्रवास करते. त्यामुळे या एक्सप्रेसला विशेष सवलत मिळावी, अशी मागणी करणार असल्याचे मुळे यांनी सांगितले.

फोटो नेम :

२०कोरेगाव रेल्वे बैठक.

कोरेगाव रेल्वे स्थानकाची भरत मुळे यांनी शुक्रवारी पाहणी केली. यावेळी अमोल भूतकर, महेश वडगावी, प्रदीप फाळके, बबन कांबळे, संतोष जाधव, उज्ज्वला निकम, सुषमा निकम उपस्थित होते. (छाया : साहिल शहा)