‘क्रेझ’साठी हातात चक्क ‘खटका’

कऱ्हाड : कोपर्डे हवेलीच्या रेल्वे फाटकाजवळ तस्करीसाठी आलेल्या युवकाला ताब्यात घेऊन पोलिसांनी गावठी कट्ट्यासह देशी बनावटीची पिस्तूल हस्तगत केले. उपविभागात यापूर्वीही पोलिसांनी अशा कारवाया केल्या आहेत; पण तरीही तस्करी थांबायला तयार नाही. वारंवार असे गुन्हे उघडकीस येत आहेत. या गुन्ह्यांत केवळ दलाल पोलिसांच्या गळाला लागताहेत; तर तस्करीच्या मुळापर्यंत पोहोचण्यात पोलीस अपयशी ठरताहेत.

कऱ्हाड शहरासह उपविभागात शस्त्रतस्करीचे लोण पसरले आहे. बेकायदा हत्यारांची आयात आणि निर्यात हा गुन्हेगारी जगताचा पाया आहे. सध्या कऱ्हाड उपविभागात तस्करीच्या माध्यमातून हाच पाया भक्कम करण्याचे प्रयत्न सुरू आहेत. उपविभागात कायदेशीररीत्या परवाना असणाऱ्या पिस्तूलधारकांची संख्या शेकडोंत आहे. मात्र, त्याहीपेक्षा बिगरपरवाना पिस्तूल वापरणाऱ्यांची संख्या कित्येक पटींनी जास्त आहे. बेकायदा शस्त्र मिळविण्यासाठी अनेकजण चोरीछुपे व्यवहार करीत आहेत.

वास्तविक, अनेकांना शस्त्राबाबतची पूर्ण माहिती नसते. देशी अथवा विदेशी बनावट, त्याची क्षमता, दर्जा यांबाबत ते अनभिज्ञ असतात. या अज्ञानाचा तस्करांकडून पुरेपूर गैरफायदा घेतला जातो. देशी बनावटीचे पिस्तूल ‘परदेशी’ कंपनीचे असल्याचे सांगून ते दलालांकडून विकले जाते. ६० ते ७० हजार रुपये मूळ किंंमत असलेली पिस्तुले परदेशी असल्याचे भासवून लाखाला विकली जातात. अशा पद्धतीने आजपर्यंत अनेक पिस्तुलांची विक्री करण्यात आली आहे. त्याबाबतचे गुन्हेही कऱ्हाडात उघडकीस आले आहेत.

सांगली, मिरज, कोल्हापूर, सातारा, कऱ्हाड येथे विविध गुन्ह्यांमध्ये पोलिसांनी जप्त केलेली पिस्तुले याच पद्धतीच्या आहेत. पिस्तुलाबरोबरच काही रिव्हॉल्व्हरही पोलिसांनी यापुर्वी हस्तगत केल्या आहेत. पिस्तुल आणि रिव्हॉल्व्हरची किंमत तुलनेने जास्त असते. मात्र, गावठी कट्टा पंचवीस ते तीस हजारात विकला जातो. त्यामुळे अनेकजण ‘क्रेझ’साठी गावठी कट्टा खरेदी करीत असल्याचेही काही गुन्ह्यांतून उघड झाले आहे.

- चौकट

कायदेशीर ९०५ : बेकायदा किती?

कऱ्हाड उपविभागातील परवाना असलेल्या शस्त्रधारकांची संख्या ९०५ आहे. मात्र, आत्तापर्यंत उघडकीस आलेल्या गुन्ह्यांतून कायदेशीरपेक्षा बेकायदा शस्त्र बाळगणाºयांची संख्या जास्त असल्याचेच समोर येत आहे. गत काही वर्षात कºहाडमध्ये अनेक गुन्हे घडले. त्यामध्ये डझनावरी शस्त्रे हस्तगत झाली आहेत.

- चौकट

...अशी असतात अग्निशस्त्रे

(फोटो : १८रिव्हॉल्व्हर)

रिव्हॉल्व्हर : या अग्निशस्त्रात सहा गोळ्या बसतात. तसेच हे शस्त्र देशी व विदेशी बनावटीचेही असते. या शस्त्राची किंमत दीड लाखापर्यंत आहे. मात्र, तस्करीत खरेदी-विक्रीची रक्कम लाखोंच्या घरात असते.

(फोटो : १८पिस्टल)

पिस्तूल : पिस्तुलाच्या मॅगझिनमध्ये दहा गोळ्या बसतात. पिस्तूल एकदा ‘लोड’ केले की ‘ट्रिगर’ दाबताच एकापाठोपाठ दहा गोळ्या बाहेर पडतात. देशी व परदेशी बनावटीमध्ये हे शस्त्र मिळते. त्याची किंमत ८० हजारांपासून तब्बल १० लाखांपर्यंत असते.

(फोटो : १८गावठी कट्टा)

गावठी कट्टा : हे शस्त्र हाताने बनविलेले असते. तसेच बनावटीत काही दोष राहिल्यास ‘ट्रिगर’ दाबताच गोळी उडेलच, हे निश्चितपणे सांगता येत नाही. एकावेळी फक्त एकच गोळी या शस्त्रात बसते.

- चौकट

१० वर्षांत ५३ शस्त्रे हस्तगत

२००९ : ११

२०१० : ५

२०११ : ३

२०१२ : २

२०१३ : ५

२०१४ : ५

२०१५ : ३

२०१६ : ५

२०१७ : ४

२०१८ : ३

२०१९ : २

२०२० : ३

२०२१ : २

फोटो : १८केआरडी०३

कॅप्शन : कऱ्हाड तालुक्यातील कोपर्डे हवेली गेटनजीक मंगळवारी युवकाला पोलिसांनी अटक केली. त्याच्याकडून गावठी कट्ट्यासह पिस्तुले आणि दोन जिवंत राउंड हस्तगत करण्यात आले होते.