कऱ्हाडला १३४ कोटी रुपयांचे अंदाजपत्रक बहुमताने मंजूर

कऱ्हाड : सुमारे दोन कोटी रुपये शिलकीचे, एकूण १३४ कोटी रुपयांचे अंदाजपत्रक गुरुवारी झालेल्या कऱ्हाड पालिकेच्या विशेष सभेत बहुमताने मंजूर करण्यात आले. सुरुवातीला भाजप नगरसेवकांकडून सूचना मांडत अर्थसंकल्प सादर करण्यात आला. मात्र, त्यात अनेक चुका असल्याचे निदर्शनास आणत जनशक्ती आघाडीने उपसूचना मांडली. ती बहुमताने मंजूर केली, पण सूचना की उपसूचना मंजूर यावरून सभागृहात गदारोळ पाहायला मिळाला.

कऱ्हाड येथे पालिकेची विशेष सभा कोरोनाच्या पार्श्वभूमीवर यशवंतराव चव्हाण स्मृती सदन येथे घेण्यात आली. नगराध्यक्षा रोहिणी शिंदे अध्यक्षस्थानी होत्या. यावेळी नगरसेवक मोठ्या संख्येने उपस्थित होते .

नगराध्यक्षा शिंदे अर्थसंकल्पीय मनोगत व्यक्त करताना म्हणाल्या, आजचा अर्थसंकल्प विकासाभिमुख आहे; लोकांच्या फायद्याचा आहे. सन २०२१-२२ सालच्या अर्थसंकल्पात सुरुवातीच्या शिलकेसह जमेच्या बाजूस ७२ कोटी ११ लाख ३५ हजार ३३८ रुपये व खर्चाच्या बाजूस ५५ कोटी ९९ लाख ६६ हजार ९२० रुपये दर्शविले आहेत.

भांडवली अर्थसंकल्प भाग २ मध्ये आरंभीच्या शिलकेसह ६२ कोटी ६७ लाख ८५ हजार ५१२ रुपये व खर्चाच्या बाजूला ६० कोटी ५८ लाख ९४ हजार ७०४ रुपये दर्शविली आहे. असे एकूण १३४ कोटी ८९ लाख वीस हजार रुपये होत आहेत.

लोकशाही आघाडीचे गटनेते सौरभ पाटील म्हणाले, अर्थसंकल्प हा सत्ताधाऱ्यांचा कामाचा आरसा असतो. तो फारसा चांगला दिसत नाही, अशी टीका करत या अर्थसंकल्पामध्ये कोणताही महत्त्वाकांक्षी प्रकल्प दिसत नाही. त्यामुळे कऱ्हाडकरांचा विश्वासघात करणारा हा अर्थसंकल्प असल्याचा घणाघात त्यांनी केला.

पालिकेच्या अर्थसंकल्पात उत्पन्नवाढीचे कोणतेच प्रयोजन नाही. उलट वर्षभरात होर्डिंग्सचे भाडे आले नाही, पण त्या अगोदर तीन वर्षांच्या होर्डिंग्सचे भाडे थकीत आहे याकडे लक्ष वेधले. दोन वर्षांत पालिकेने करमणूक कर वसूलच केलेला नाही, ही गोष्ट ही निदर्शनास आणून दिली. या व इतर बाबींकडे दुर्लक्ष करीत पालिका नको त्या गोष्टींची भाडेवाढ करून धूळफेक करत असल्याचा आरोपही सौरभ पाटील यांनी केला.

आरोग्य सभापती विजय वाटेगावकर यांनी बजेटमध्ये फार कोणतीही वाढ करायची नाही, असे स्टॅंडिंग कमिटीच्या बैठकीत ठरले होते. असे असताना बजेटमध्येही वाढ आलीच कशी, असा मुद्दा उपस्थित करीत प्रशासनाला धारेवर धरले, तर काही उपसूचना मांडल्या.

जनशक्ती आघाडीच्यावतीने स्टेडियमची केलेली भाडेवाढ अवास्तव असून ती अमान्य करत रद्द करण्याची उपसूचना मांडली. ट्रान्सपोर्ट सेंटरची जुनी इमारत पाडून नवीन चांगली वास्तू उभी करणे अशा अनेक सूचना त्यांनी मांडल्या, पण सूचना की उपसूचना मंजूर करायची यावरून सभागृहात शेवटी गदारोळ पाहायला मिळाला.

चौकट

ते परस्परच कारभार चालवत असतील तर ...

स्टॅंडिंगच्या बैठकीत नसणारे विषय अर्थसंकल्पात कसे आले यावरून बरीच चर्चा झाली. याचा जाब अनेक नगरसेवक विचारू लागले, पण उत्तर द्यायला मुख्याधिकारी रमाकांत डाकेच उपस्थित नव्हते. त्यामुळे मुख्याधिकारी परस्पर पालिकेचा कारभार चालवणार असतील, तर आपण निवडून येऊन उपयोग तरी काय ? असा सवाल अनेक नगरसेवकांनी उपस्थित केला.