पुरावे दाखल करून घेण्यास चौकशी अधिकाऱ्यांचा नकार

सातारा : सातारा पालिकेत घडलेल्या लाचखोर प्रकरणातील मूळ तक्रारदार व यशश्री एंटरप्रायझेसचे प्रकल्प व्यवस्थापक अमित शिंदे यांनी सादर केलेले पुरावे रेकॉर्डवर घेण्यास चौकशी अधिकारी डॉ. के.आर. सिंघल यांनी गुरुवारी नकार दर्शविल्याने या प्रकरणाने आता वेगळे वळण घेतले आहे. दरम्यान, या प्रकरणात तडजोड झाल्याचा आरोप करत शिंदे यांनी या प्रकरणाची निष्पक्ष चौकशी व्हावी, अशी मागणी सामान्य प्रशासनाच्या सचिवांकडे केली आहे.

सातारा पालिकेचे उपमुख्याधिकारी संचित धुमाळ यांना २ लाख ३० हजारांची लाच घेताना लाचलुचपत प्रतिबंधक विभागाने ८ जून २०२० रोजी रंगेहाथ पकडले होते. या प्रकरणात आरोग्य निरीक्षक राजेंद्र कायगुडे, प्रवीण यादव व गणेश टोपे यांची नावे समोर आल्यानंतर त्यांना अटक करण्यात आली होती. या प्रकरणातील संबंंधित अधिकाऱ्यांची निवृत्त पशुवैद्यकीय अधिकारी डॉ. के.आर. सिंघल यांच्याकडून स्वतंत्र चौकशी केली जात आहे. गुरुवारी राजेंद्र कायगुडे यांची चौकशी करण्यात आली.

या प्रकरणातील मूळ तक्रारदार अमित शिंदे यांनाही पुराव्यानिशी हजर राहण्याचे आदेश देण्यात आले होते. मात्र चौकशीदरम्यान सिंघल यांनी शिंदे यांच्याकडील पुरावे रेकॉर्डवर घेण्यास नकार दर्शविला. शिंदे यांनी कारण विचारताच यशश्री एंटरप्रायझेसचे प्रोपरायटर मनवे यांना हजर करावयास सांगून तुमचा या प्रकरणाशी काही संबंध नाही, अशी भूमिका सिंघल यांनी घेतली. चौकशी अधिकाऱ्यानेच मूळ तक्रारदाराचे पुरावे नाकारल्याने या प्रकरणाला आता वेगळे वळण लागले आहे.

दरम्यान, संशयित आणि चौकशी अधिकारी यांच्यात काही तडजोड झाल्याचा आरोप अमित शिंदे यांनी केला आहे. या प्रकरणी मंत्रालयाच्या सामान्य प्रशासन विभागाकडे त्यांनी तातडीने लेखी तक्रार करून लाचखोर प्रकरणाची निष्पक्ष चौकशी व्हावी, अशी मागणी त्यांनी केली आहे.