शनैश्वर देवस्थानच्या मदतीमुळे लोककलावंताच्या चेहऱ्यावर फुलले हास्य

शनैश्वर देवस्थान मदतीमुळे लोककलांवत भारावला

लोकमत न्यूज नेटवर्क

पिंपोडे बुद्रुक : कोरोना विषाणू संसर्गाच्या पार्श्वभूमीवर निर्माण झालेल्या प्रतिकूल परिस्थितीत आजवर उपजीविका करणारी कलाही फोल ठरली. त्यामुळे हतबल झालेल्या लोककलावंतावर भंगार गोळा करून जगण्याची वेळ आल्यानंतर श्रीशनैश्वर देवस्थानकडून मदत करण्यात आली. कलेच्या माध्यमातून लोकांच्या चेहऱ्यावर हास्य फुलविणारा लोककलावंत देवस्थानच्या या मदतीने पुरता भारावून गेला.

सबंध मानवजातीवर ओढावलेला कोरोना विषाणू संसर्ग व त्यामुळे निर्माण झालेल्या परिस्थितीमुळे सर्वसामान्यांचे जगणे मुश्किल झाले आहे. बहुतांशी लोकांचे उपजीविकेचे साधन बंद झाल्याने उपासमारीची वेळ आली. त्यामुळे मिळेल ते काम काम करून जगण्याची सर्वत्र धडपड सुरू आहे. कलेच्या माध्यमातून लोकांच्या मनाचा ठाव घेऊन त्यांचे मनोरंजन करणारा तमाशा व्यवसाय कोरोनामुळे धोक्यात आला आहे. याच कलेच्या माध्यमातून आपल्या कुटुंबीयांसह आणखी दहा ते बारा जणांच्या कुटुंबीयांना रोजगार उपलब्ध करून देणाऱ्या रवींद्र पिंपळे यांच्यावर भंगार गोळा करण्याची वेळ आली. लोककलावंतावर आलेल्या या विदारक परिस्थितीची दखल घेत सोळशी येथील शनैश्वर देवस्थान ट्रस्टचे मठाधिपती प. पू. नंदगिरी महाराज यांनी त्यांना जीवनावश्यक वस्तूंसह रोख रक्कम स्वरूपात मदत केली.

दरम्यान, कोरोनामुळे अडचणीत आलेल्या लोककलावंताला मदत करत शनैश्वर देवस्थानने केलेल्या या कलेच्या व माणुसकीच्या आदराचे सर्वच स्तरांतून कौतुक होत आहे. त्यामुळे मदतीचे काही हात पुढे आले आहेत.

--------------------------------–--------------

सामाजिक प्रबोधनाचे अधिष्ठान म्हणून नावारूपास आलेले शनैश्वर देवस्थान नेहमीच अडचणीतील लोकांना मदत करते. कोरोनाकाळात देवस्थानाच्या वतीने जीवनावश्यक वस्तूंसह आरोग्यविषयक बाबींची मदत करण्यात आली आहे. यापुढील काळातही देवस्थानच्या वतीने समाजोपयोगी कार्याला प्राधान्य दिले जाईल.

- प. पू. शिवयोगी नंदगिरी महाराज

मठाधिपती, शनैश्वर देवस्थान

----------------------------------------------

शनैश्वर देवस्थानकडून नेहमीच गरिबांसाठी मदत केली जाते. या काळात देवस्थानकडून मदत मिळाल्याने माझ्या व माझ्या कुटुंबीयांवरील उपासमारीची वेळ टळली आहे.

- रवींद्र पिंपळे, कलावंत

----------------------------------------------