पार्ले येथे मोफत कोरोना तपासणी

कोपर्डे हवेली : पार्ले (ता. कऱ्हाड) येथे ग्रामपंचायत आणि प्राथमिक आरोग्य केंद्र, सदाशिवगड यांच्या संयुक्त विद्यमाने मोफत कोरोना तपासणी शिबिर राबविण्यात आले.

यावेळी पार्लेच्या सरपंच आश्विनी मदने, उपसरपंच मोहन पवार, अविनाश नलवडे, सोसायटीचे सचिव संभाजी नलवडे, वैद्यकीय अधिकारी डॉ. घाडगे आदी उपस्थित होते.

सध्या कोरोनाबाधित रुग्णांची संख्या दिवसेंदिवस वाढतच आहे. कोरोनाशी लढण्यासाठी प्रशासन सज्ज झाले आहे. परंतु लोक ही बाब गांभीर्याने घेताना दिसत नाहीत. त्यामुळे कोरोनाचा शिरकाव किंवा फैलाव गावात होऊ नये म्हणून पार्ले ग्रामपंचायतीने प्राथमिक आरोग्य केंद्र, सदाशिवगड यांच्या सहकार्याने गावामध्ये किराणा दुकानचालक, सलून दुकानदार, दूध डेअरीचालक, सेवा सोसायटीचे कर्मचारी, स्वस्त धान्य दुकानदार, पानपट्टीधारक, आशा सेविका, अंगणवाडी सेविका, ॲटो रिक्षाचालक म्हणजेच ज्या लोकांचा इतर लोकांशी व्यावहारिकदृष्ट्या जास्तीत-जास्त संपर्क येतो, अशा लोकांची कोरोना तपासणी मोफत करण्यात आली.