वृक्षतोडप्रकरणी मिळकतधारकांवर गुन्हा दाखल

महाबळेश्वर : विल्सन पॉईंटजवळ असलेल्या बेलमाउंट सोसायटीतील प्लॉट नं. सातमध्ये झालेल्या वृक्षतोडीची पालिकेने गंभीर दखल घेतली. याप्रकरणी संबंधित मिळकतधारकांवर पोलीस ठाण्यात गुन्हा नोंद करण्यात आला आहे.

याबाबत माहिती अशी की, राष्ट्रीय हरित लवादाने २००६ मध्ये झालेल्या वनसदृश मिळकतींचा सर्व्हे पुन्हा करण्याचे आदेश दिले होते. या आदेशानुसार महाबळेश्वर तालुक्यात वनसदृश मिळकतींची पाहणी सुरू आहे. यासाठी प्रत्यक्ष व ड्रोनच्या मदतीने पाहणी केली जाते. सॅटेलाईट इमेजेसच्या आधारे मिळकत वनसदृश आहे का नाही याबाबत निर्णय घेतला जातो. आपली मिळकत ड्रोनमध्ये वनसदृश दिसू नये यासाठी विल्सन पॉईंटजवळील एका मिळकतधारकांनी विविध जातींच्या तीस मोठ्या वृक्षांची तोड केली. वृक्षतोडीच्या पुराव्यांची मिळकतधारकांनी तातडीने विल्हेवाट लावली व येथे काहीच झाले नाही असे वातावरण तयार केले.

ही माहिती मिळताच वनसदृश मिळकतींची पाहणी करणारे पथक त्या ठिकाणी पोहोचले. मुख्याधिकारी पल्लवी पाटील यांनी पाहणी करून वृक्षतोडीचा पंचनामा करून मिळकतधारकांना नोटीस बजावण्याचे आदेश दिले. त्यानुसार पालिकेचे वृक्ष अधिकारी कल्याण हिवरे यांनी पंचनामा केला. यामध्ये २००६ मध्ये केलेल्या वृक्ष गणनेत व आता मिळकतीत असलेल्या वृक्षांच्या संख्येत तफावत आढळत होती. यावेळी तीस वृक्षांची कत्तल केल्याचे निदर्शनास आले. यामध्ये जांभुळ तेरा, अंजन नऊ, मेडसिंग सहा व भोमा जातीच्या दोन वृक्षांचा समावेश आहे. निसर्ग संपदेची हानी मिळकतधारकांनी केल्याने पालिकेने त्यांना तातडीने नोटीस बजावली व वृक्षतोडीचा परवाना सादर करण्याची सूचना केली.

मुदतीत मिळकतधारकांनी कोणत्याही प्रकारचा वृक्षतोडीचा परवाना न दिल्याने पालिकेने संबंधित मिळकतधारकांवर गुन्हा दाखल करण्याचा निर्णय घेतला असल्याची माहिती पालिकेच्या मुख्याधिकारी पल्लवी पाटील यांनी दिली. पालिकेच्या वृक्ष अधिकाऱ्यांनी शनिवारी महाबळेश्वर पोलीस ठाण्यात वृक्षतोडीस जबाबदार धरून मिळकतधारक रॉबिन कुमार, अनिल कुमार, एस. एच. सोमाणी व सुधीर मंगळवेढेकर (सर्व रा. पुणे) यांच्या विरोधात महाबळेश्वर पोलीस ठाण्यात तक्रार दाखल केली आहे.