अतिक्रमण विभागाच्या कर्मचाऱ्याशी हुज्जत

सातारा : अनधिकृत फ्लेक्स बोर्ड जप्त केल्याने आरटीओ कार्यालयासमोरील एका एजंटाने अतिक्रमण विभागाच्या कर्मचाऱ्याशी हुज्जत घालण्याचा प्रयत्न केला. यावेळी झालेल्या झटापटीत कर्मचाऱ्याच्या हाताला दुखापतही झाली. दरम्यान, अतिक्रमण पथकाने गुरुवारी दिवसभरात ८० फ्लेक्स बोर्ड जप्त केले.

सातारा शहरात ठिकठिकाणी लावण्यात आलेल्या फ्लेक्स बोर्डमुळे शहराचे रूप बकाल होऊ लागले आहे. प्रमुुख मार्ग, चौक, फूटपाथ तसेच गल्लीबोळातही वेगवेगळ्या जाहिरातींचे तसेच शुभेच्छांचे फलक विनापरवाना लावण्यात आले आहेत. अशा फुकट्या जाहिरातदारांमुळे पालिकेचा लाखो रुपयांचा महसूल मात्र बुडत आहे. या सर्व परिस्थितीचा आढावा घेत ‘लोकमत’मध्ये ‘विनापरवाना फ्लेक्स बोर्डमुळे शहराचे विद्रुपीकरण’ या मथळ्याखाली वृत्त प्रसिद्ध करण्यात आले. याची तातडीने दखल घेत पालिकेच्या अतिक्रमण विभागाने बुधवारी शहरातून तब्बल २२१ फ्लेक्स बोर्ड जप्त केले, तर गुरुवारी आरटीओ कार्यालय, भूविकास बॅँक चौक, बसस्थानक व पोवईनाका या मार्गावरील ८० फ्लेक्सबोर्ड जप्त करण्यात आले.

दरम्यान, आरटीओ कार्यालयासमोर रस्त्यावरील फ्लेक्स बोर्ड जप्त करताना एका एजंटाने अतिक्रमणच्या कर्मचाऱ्याशी हुज्जत घालण्याचा प्रयत्न केला. यावेळी झालेल्या शाब्दिक वादावादीनंतर एजंटाने कर्मचाऱ्याच्या हातून फ्लेक्स हिसकावण्याचा प्रयत्न केला. या झटापटीत कर्मचाऱ्याला हाताला दुखापत झाली. अतिक्रमण विभाग प्रमुख प्रशांत निकम यांनी या घटनेची माहिती पोलीस कर्मचाऱ्याना दिली. पोलीस घटनास्थळी दाखल होईपर्यंत संबंधित एजंट तेथून निघून गेला.

(चौकट)

पोलीस संरक्षणाची गरज

अतिक्रमण हटविण्याच्या कारणावरून पालिका कर्मचाऱ्यांना मारहाण, धक्काबुक्की, दमदाटी करण्याच्या घटना यापूर्वी अनेकदा घडल्या आहेत. अशा घटना रोखण्यासाठी मुख्याधिकारी अभिजित बापट यांनी पोलीस बंदोबस्तात अतिक्रमण हटाव मोहीम राबविणे गरजेचे आहे.

फोटो : ०७ जावेद ०७

सातारा पालिकेच्या अतिक्रमण विभागाने गुरुवारी आरटीओ कार्यालयाच्या आवारातील अनधिकृत फ्लेक्स बोर्ड जप्त केले. (छाया : जावेद खान)