शेंद्रेत ग्रामविकास पॅनेलविरुद्ध अजिंक्य पॅनेलमध्ये अटीतटीची लढत.

शेंद्रे : सध्या ग्रामपंचायत निवडणुकीचे धुमशान गावा-गावात सुरू आहे. सातारा तालुक्यातील शेंद्रे जिल्हा परिषद गटातील राजकीयदृष्या संवेदनशील असलेल्या शेंद्रे ग्रामपंचायत निवडणुकीत ग्रामविकास पॅनेल विरुद्ध अजिंक्य पॅनेल यांच्यामध्ये ‘कांटे की टक्कर’ रंगली आहे. १३ सदस्य असलेल्या शेंद्रे ग्रामपंचायतीत २६ अर्ज शिल्लक राहिल्याने दोन्ही पॅनेलमध्ये सरळ लढत होत आहे. यामध्ये कोण बाजी मारणार याकडे तालुक्याचे लक्ष लागले आहे.

शेंद्रे हे जिल्हा परिषद गटातील सर्वात जास्त मतदान असलेले गाव असल्याने या निवडणुकीवर संपूर्ण जिल्हा परिषद शेंद्रे गटाचे लक्ष असते. या निवडणुकीच्या पार्श्वभूमीवर शेंद्रे गावातील वातावरण ढवळून निघाले आहे. फोडाफोडीच्या राजकारणाला ऊत आला आहे. ग्रामविकास पॅनेलमार्फत प्रभाग क्रमांक एकमधून दीपाली संजय माने, बापूसाहेब रामचंद्र पोतेकर, कोमल विशाल विभुते. वाॅर्ड दोनमध्ये सारिका संभाजी बर्गे, पाकीजा यासीन मुलाणी, मारुती रामचंद्र पडवळ, वाॅर्ड तीनमध्ये सुरेखा सुरेश घोलप, विजय रामचंद्र जाधव, वाॅर्ड चारमध्ये भानुदास विष्णू विभुते, निर्मला विजय पोतेकर, विष्णू ज्योती जाधव यांना उमेदवारी देण्यात आली आहे.

तसेच अशोकराव मोरे विचार मंचचे अजिंक्य पॅनेलमधून वाॅर्ड एकमध्ये मनीषा दत्तात्रय क्षीरसागर, सागर बाळकृष्ण पोतेकर, स्वाती स्वप्निल पडवळ, वाॅर्ड दोनमध्ये नंदिनी किशोर भोसले, सुरेखा राजेंद्रकुमार दीक्षित, हणमंत श्रीरंग पडवळ, वाॅर्ड तीनमध्ये पूनम सोमनाथ जाधव, श्रीरंग लक्ष्मण वाघमारे, वाॅर्ड चारमधून रेखा सुनील पडवळ, आस्लम हुसेन मुलाणी, सोपान शिवाजी भोसले या उमेदवारांना उमेदवारी देण्यात आली आहे.

चौकट :

वॉर्ड चारच्या निकालावर सत्तेचे गणित

शेंद्रे ग्रामपंचायत निवडणुकीत तीन सदस्य असलेल्या वॉर्ड चारवर ज्या गटाचे वर्चस्व राहणार, त्या गटाच्या ताब्यात ग्रामपंचायतीची सत्ता जाणार, याची दाट शक्यता आहे. या वॉर्डात अजिंक्यतारा सहकारी साखर कारखान्याच्या कामगार वसाहतीचे मतदान जास्त आहे.

चौकट :

दोन्ही राजेंची भूमिका तटस्थ

या ग्रामपंचायत निवडणुकीत आमदार शिवेंद्रसिंहराजे भोसले व खासदार उदयनराजे भोसले या दोघांचे कार्यकर्ते दोन्ही पॅनेलमध्ये विभागले असल्याने दोन्ही राजे या निवडणुकीत कोणत्याही गटाला ताकद न देता तटस्थ राहण्याची भूमिका घेणार असल्याचे दिसून येत आहे. निवडणुकीत कोणताही गट विजयी झाला तरी दोन्हीही गट आमदार व खासदार यांचेच नेतृत्व मानणारे आहेत.