पंधरा तासांनंतर जखमी बिबट्याची शोधमोहीम थांबली

लोकमत न्यूज नेटवर्क

मलकापूर : जखमी बिबट्याचा जीव वाचविण्यासाठी १५ तास स्पेशल रेस्क्यू ऑपरेशन राबविण्यात आले. कराड वनविभागाच्या कर्मचाऱ्यांसह कोल्हापूर येथील विशेष पथकाने ओढे-नाल्यांसह २० हेक्टर ऊसाचे क्षेत्र पिंजून काढूनही बिबट्या सापडला नाही. दरम्यान, अपघातानंतर उपलब्ध झालेल्या व्हिडिओतील हालचालीवरून त्याला मोठी दुखापत झाली नसल्यामुळे तो नैसर्गिक अधिवासात मार्गस्थ झाल्याचा अंदाज वनविभागाने वर्तविला आहे. त्यामुळे पंधरा तासांनंतर जखमी बिबट्याची शोधमोहीम थांबविण्यात आली.

सिमेंटच्या जंगलात वाढ झाल्यामुळे नैसर्गिक जंगलाचा ऱ्हास होत आहे. परिणामी वन्यप्राण्यांचा नागरी वस्तीतील वावर दिवसेंदिवस वाढल्याने भक्ष्याच्या शोधात बाहेर पडणाऱ्या वन्यप्राण्यांच्या जिवावर बेतत आहे. गेल्या दहा दिवसांत वाहनाच्या धडकेत बिबट्याचा मृत्यू होण्याच्या चार घटना घडल्या आहेत. तर ऊसाच्या रानात मृत अवस्थेत बिबट्या सापडल्याच्या घटनाही उघड झाल्या आहेत. तशीच घटना नांदलापूर गावच्या हद्दीत पाचवडफाट्यानजीक हॉटेल समृद्धीसमोर मंगळवारी रात्री अकरा वाजण्याच्या सुमारास घडली. अज्ञात वाहनाची धडक बसल्यानंतर अचानक बिबट्याने महामार्गावरच ठिय्या मारला. पंधरा मिनिटांतच गर्दी बघून जखमी बिबट्याने जीव वाचविण्यासाठी महामार्ग ओलांडून कृष्णा नदीकडील ऊसाच्या रानात धूम ठोकली होती. त्या दिवशी रात्रीच्यावेळी अधिकाऱ्यांसह प्राणीमित्र व नागरिकांनी रात्री साडेबारा वाजेपर्यंत महामार्गालगत व ऊसाच्या बाजूने शोध घेतला. मात्र, बिबट्या आढळला नाही. साडे बारा वाजता शोधमोहीम थांबविली. बुधवारी सकाळी पुन्हा साडेसात वाजता शोधमोहीम सुरू केली. बिबट्याचा जीव वाचविण्यासाठी स्पेशल रेस्क्यू ऑपरेशन राबविण्यात आले. या शोधमोहिमेसाठी वन्यजीव सुरक्षाअंतर्गत फॉरेस्ट ट्रॅकचा अवलंब करण्यात आला. तर बुधवारी सकाळपासूनच १५ तासांत निनाई ओढ्याच्या दुतर्फा २० हेक्टर ऊसक्षेत्रात शोधमोहीम राबविली. या शोधमोहिमेत कराड वन विभागासह कोल्हापूर येथील विशेष पथकातील अकरा कर्मचाऱ्यांनी ओढे-नाल्यांसह झाडा-झुडपातून व ऊसाचे क्षेत्र पिंजून काढूनही बिबट्या सापडला नाही. दरम्यान, अपघातानंतरचा एक व्हिडिओ वनविभागाला उपलब्ध झाला. त्या व्हिडिओतील बिबट्याच्या गतिमान हालचालीवरून त्याला मोठी दुखापत झाली नसल्याचे जाणवत आहे. त्यामुळे तो नैसर्गिक अधिवासात मार्गस्थ झाल्याचा अंदाज वर्तवित वनविभागाकडून पंधरा तासांनंतर जखमी बिबट्याची शोधमोहीम थांबविण्यात आली आहे.

चौकट

शेतकऱ्यांनी सतर्क राहण्याची आवश्यकता

महामार्गाच्या पूर्वेस ऊसाचे क्षेत्र मोठ्या प्रमाणात आहे. सध्या ऊसतोडणी सुरू आहे. त्यामुळे या परिसरातील शेतकरी, ट्रॅक्टर चालक मालक, ऊसतोडणी मुकादम व मजुरांना सतर्क राहण्याच्या सूचना दिल्या आहेत. तसे काही आढळल्यास तत्काळ वनविभागाशी संपर्क करावा, असे अावाहनही वनपाल ए. पी. सवाखंडे यांनी केले आहे.