भोंगा सुरू झाल्याने सगळ्यांचीच पळापळ !

सातारा : चोरीच्या घटना घडू नये, प्रयत्न झाला तरी त्याची माहिती परिसरातील नागरिक, मालकाला व्हावी, यासाठी बँक, सराफपेढीत विविध उपकरणे बसविलेली असतात. सदर बझारमधील एका सराफपेढीत मात्र मालकानेच दुकाने उघडले अन् सायरन सुरू झाला. काही केल्या तो थांबत नव्हता. काही तरी गोंधळ असेल असे समजून नागरिकांची गर्दी वाढली. अखेर वायर तोडून तो बंद करण्यात आला.

बँका, मोठे व्यापारी तसेच घरीही चोरीच्या घटनांवर आळा घालण्यासाठी खबरदारीच्या उपाययोजना करण्याबाबत पोलिसांतर्फे नेहमीच आवाहन केले जाते. यामध्ये सीसीटीव्ही कॅमेरे, सेन्सर बसविले जातात. ही यंत्रणा असलेले दुकानाचे शटर कोणी उघडण्याचा प्रयत्न केला तर भोंगा वाजण्यास सुरुवात होते. काही वेळा संबंधित दुकानाचे मालक, व्यवस्थापक, पोलिसांना मेसेज जातात. मोठा अनर्थ टळत असल्याने साताऱ्यातील अनेक व्यापाऱ्यांनी अशा यंत्रणा कार्यान्वित केल्या आहेत.

सदर बझारमध्येही गुरुवारी सकाळी नेहमीप्रमाणे लगबग सुरू होती. एका सराफपेढीचे मालकही आले. त्यांनी शटर उघडले असता भोंगा वाजण्यास सुरुवात झाली. वास्तविक हा भोंगा नेहमीच वाजत असतो. मात्र भोंगा रिमोटच्या साहाय्याने तो बंद करतात. त्यामुळे फारसा फरक पडत नाही. नेहमीप्रमाणे संबंधित दुकानदाराने रिमोटद्वारे भोंगा बंद करण्याचा प्रयत्न केला; पण तो बंद काही केल्या होईना. हा आवाज सर्व परिसरात झाला. सुमारे अर्धा तास तो वाजत असल्याने काय झाले हे पाहण्यासाठी नागरिकांचीही गर्दी वाढू लागली. अखेर त्यांतीलच एका व्यक्तीने वायर तोडून सायरन बंद केल्यानंतर जीव भांड्यात पडला.