शहरात हवेची गुणवत्ता तपासणी यंत्रणा सज्ज

वाई : राज्यात पर्यावरण वातावरणातील बदल विभागामार्फत ऑक्टोबर २० ते मार्च २१ या सहा महिन्यांच्या कालावधीत माझी वसुंधरा अभियान राज्यातील सर्व स्थानिक स्वराज्य संस्थांमध्ये राबविण्यात येत आहे. या अभियानामध्ये पर्यावरण रक्षणाच्या अनुषंगाने पृथ्वी, जल, अग्नी, आकाश, वायू या निसर्गाशी संबंधित पंचतत्त्वांवर आधारित उपाययोजना करून शाश्‍वत निसर्गपूरक जीवनपद्धती अवलंबिण्यासाठी विविध कामे करण्यात येत आहेत. वाई नगरपरिषदेमार्फत देखील या अभियानाची प्रभावीपणे अंमलबजावणी करण्यात येत आहे.

शहरातील वायू गुणवत्ता नियंत्रणात राहण्यासाठी विविध उपाययोजना तसेच जनजागृती कार्यक्रम हाती घेण्यात आले आहेत. या अभियानांतर्गत वृक्षारोपण, सार्वजनिक उद्याने व विविध ठिकाणांचे संवर्धन, घनकचरा व्यवस्थापन, हवेच्या गुणवत्ता देखरेखीसाठी शहरात प्रणाली बसविणे, सायकल, ई-मोटार वाहन रॅली काढणे, शहरातील धुळीचे प्रमाण कमी करण्यासाठी शहरात हरित आच्छादन वाढविणे, नाल्याच्या तोंडाशी जाळ्या बसविणे, पाण्याच्या स्त्रोतांचे इको रिस्टोरेशन करणे, नदीमध्ये ठिकठिकाणी इको ब्रिजेस बांधणे आदी कामे करण्यात येणार आहेत.

निसर्गाशी संबंधित असलेल्या या उपक्रमाचा भाग म्हणून शहरातील वायू प्रदूषणाची तपासणी केली जात आहे. यासाठी वाई नगरपरिषदेमार्फत शहरात हवेची गुणवत्ता तपासणी यंत्रणा बसविण्यात आली आहे. शहराचा निवासी भाग, बाजारपेठ भाग आणि घनकचरा प्रकल्प केंद्र अशा ३ ठिकाणी ही यंत्रणा बसविण्यात आली आहे. यामुळे शहरातील प्रदूषणाचे मोजमाप करणे शक्य होणार असून, या यंत्रणेमुळे हवेत कोणकोणते प्रदूषणकारक घटक आहेत. त्यांचे प्रमाण किती आहे. याची माहिती मिळणार आहे. त्याचबरोबर हे घटक कोणत्या कारणामुळे हवेत येतात ही माहितीदेखील घेणे शक्य होणार आहे. या माहितीच्या मदतीने हवेची गुणवत्ता सुधारण्यासाठी विविध उपाययोजना करण्याचे योजणार आहे. शहरातील हवेचा सुधारलेला पोत ही बाब समस्त वाईकरांसाठी आल्हाददायी ठरणार आहे. त्यासाठी नागरिकांनी देखील आपले योगदान देणे आवश्यक आहे.

(चौकट)

माझी वसुंधरा अभियानाची अंमलबजावणी वाई नगरपरिषदेमार्फत करण्यात येत असून, वाईकरांनी यामध्ये सक्रिय सहभाग नोंदवून अभियान यशस्वी करण्यासाठी आणि शहराचे आरोग्य चांगले राहण्यासाठी प्रशासनास सहकार्य करावे.

- विद्यादेवी पोळ, मुख्याधिकारी

फोटो २६वाई

वाई शहरातील वायू गुणवत्ता तपासणी यंत्रणासमवेत पालिकेचे अधिकारी व कर्मचारी उपस्थित होेते.