विज वितरणने २४ तक्रारींचा केला ऑनलाइन निपटारा

सातारा : सातारा जिल्ह्यात आतापर्यंत व्हॉट्सअ‍ॅपद्वारे एकूण २७ तक्रारी प्राप्त झाल्या आहेत. त्यापैकी २४ तक्रारींचे तात्काळ निवारण करण्यात आले आहे. उर्वरित ३ तक्रारींमध्ये प्रशासकीय मंजुरीची गरज असल्याने त्याबाबत कार्यवाही सुरू असल्याची माहिती वीज वितरणाचे अधीक्षक अभियंता गौतम गायकवाड यांनी दिली.

जिल्ह्याच्या शहरी व ग्रामीण भागातील वीज तारा तुटणे, झोल पडणे किंवा लोंबकळणे, फ्युज पेट्या व फीडर पिलरचे दरवाजे तुटणे किंवा नसणे, खोदाईमुळे भूमिगत केबल उघड्यावर पडणे अशा वीज सुरक्षेला धोका निर्माण करणाऱ्या यंत्रणेची माहिती मोबाइलच्या व्हॉट्सअ‍ॅपद्वारे द्यावी, असे आवाहन महावितरणकडून करण्यात आले आहे.

दरम्यान, ऊस गळीत हंगाम सुरू असल्याने सध्या ऊसतोडणीचे काम वेगाने सुरू आहे. अनेक ठिकाणी लोंबकळणाऱ्या वीज तारांचे घर्षण होऊन किंवा इतर विद्युत कारणांनी उसाला आगी लागत असल्याच्या तक्रारी प्राप्त होत आहेत. या पार्श्वभूमीवर शेतकरी बांधवांनी वीज यंत्रणा धोकादायक असल्यास त्याची माहिती व्हॉट्सअ‍ॅपद्वारे दिल्यास महावितरणकडून तातडीने दुरुस्ती कामे करण्यात येत आहेत.

महावितरणची वीज तार तुटलेली आहे. झोल किंवा लोंबळकत आहे. फ्युज पेट्या किंवा फीडर पिलरचे झाकणे उघडी किंवा तुटलेली आहेत. रोहित्रांचे कुंपण उघडे आहे. खोदाईमुळे भूमिगत वाहिनी उघड्यावर आहेत आदी स्वरुपाची माहिती/तक्रार छायाचित्रांसोबत संबंधित स्थळाच्या संपूर्ण पत्त्याचा उल्लेख करून किंवा लोकेशनसह व्हॉट्सअ‍ॅपच्या मोबाइल क्रमांकावर नागरिकांना पाठवता येत आहे. यासोबतच महावितरणच्या टोल फ्री क्रमांकावर देखील सध्या सुरू असलेली ही सेवा उपलब्ध आहे.

चौकट :

सातारा जिल्ह्यासाठी ७८७५७६८५५४ हा व्हॉट्सअ‍ॅप मोबाइल क्रमांक उपलब्ध करून दिला आहे. या क्रमांकावर फक्त वीज वितरण यंत्रणेपासून सुरक्षेचा धोका असल्याचा फोटो व संपूर्ण पत्ता किंवा लोकेशनसह तक्रार स्वीकारण्यात येत आहे. या क्रमांकावर नागरिकांना कॉल करण्याऐवजी फक्त व्हॉट्सअ‍ॅपद्वारे माहिती द्यावी. तसेच ज्या नागरिकांकडे व्हॉट्सअ‍ॅप नाहीत त्यांनी ‘एसएमएस’द्वारे या मोबाइल क्रमांकावर माहिती दिल्यास त्याचेही निराकरण करण्यात येणार आहे.

कोट :

नागरिकांनी पाठविलेल्या काही तक्रारींचे निवारण करण्यासाठी वरिष्ठ कार्यालयांची मंजुरी, निधी किंवा शिफ्टिंगची गरज असल्यास तसे प्रस्ताव वरिष्ठ कार्यालयाकडे पाठविण्यात येतील व त्याबाबत संबंधित तक्रारकर्त्यांना कळविण्यात येणार आहे. महावितरणच्या या उपक्रमाला सार्वजनिक वीज सुरक्षेसाठी प्रतिसाद द्यावा व सहकार्य करावे.

- अंकुश नाळे, प्रादेशिक संचालक