बारा वर्षांच्या मुलाच्या खुनाला व्यसनाची किनार !

सातारा : दगडाने ठेचून खून झालेल्या बारा वर्षांच्या मुलाच्या खुनाला व्यसनाची किनार असल्याचे पोलिसांच्या तपासात पुढे येत आहे. ज्या मुलाने खून केला, तो सोळा वर्षांचा मुलगा गांजा आणि सिगारेट ओढत होता. व्यसनाच्या अधीन झालेल्या त्या मुलाला नेहमी प्रचंड रागही अनावर होत होता. ‘सर्किट’ म्हणूनच वस्तीवरील लोक त्याच्याकडे पाहत होते. असे असतानाच त्याला बारा वर्षांच्या मुलाने ‘नेपाळी’ म्हणून चिडवलं अन् व्यसनाधीन झालेल्या त्या ‘सर्किट’ मुलाने त्याचा दगडाने ठेचून खून केला.

सातारा शहरापासून जेमतेम चार किलोमीटर अंतरावर असलेल्या म्हसवे गावानजीक लमाण वस्ती आहे. या वस्तीवर सोलापूर जिल्ह्यातील अक्कलकोट तालुक्यातील अनेक कुटुंबे मोलमजुरीच्या निमित्ताने स्थायिक झाली. इथल्या वस्तीवरील मुलांचे आठवी ते दहावीपर्यंत शिक्षण झाले. काहींनी अर्ध्यातूनच शिक्षण सोडले, तर काहीजण अद्यापही शिक्षण घेत आहेत. या वस्तीवर बरीच कुटुंबे शिकली सवरलेली पण आहेत. मात्र, आपले काम भले आणि आपण, असा त्यांचा रोजचा दिनक्रम असतो. अशा या लमाण वस्तीवर बारा वर्षांच्या गंगाराम राठोड या मुलाचा खून झाल्यानंतर अनेक प्रश्न उपस्थित झाले. केवळ शिवीगाळ केल्याचा बदला म्हणून इतक्या टोकाची भूमिका घेऊन गंगारामला त्या मुलाने का मारले असेल? असे अनेक प्रश्न पोलिसांसह सर्व सातारकरांनाही पडले. त्यामुळे ‘लोकमत’ टीम गुरुवारी दुपारी लमाण वस्तीवर पोहोचली. वस्तीवरील वयोवृद्ध आणि काही युवकांशी चर्चा केल्यानंतर गंगारामच्या खुनापाठीमागील एक-एक किस्सा उलगडू लागला. लोक सांगू लागले. तो मुलगा खरं तर या वस्तीवर ‘सर्किट’ म्हणूनच ओळखला जातोय. कुणी काही म्हटलं तर तो अंगावर चाल करून यायचा. सतत गांजा आणि सिगारेट ओढून नशेत तर्रर असायचा. वडापावच्या गाड्यावर काम करत असताना तेवढाच तो ठिकठाक असायचा. परंतु इतर वेळी म्हणे तो स्वत:च्या तंद्रीत असायचा. मुलांमध्येही तो फारसा रमायचा नाही. त्याचे नाक थोडं बसकं. त्यामुळे गंगाराम त्याला नेपाळी म्हणून चिडवत होता. अगोदरच व्यसनाधीन असलेल्या त्या मुलाला राग येण्यास अवकाश. तो जर व्यसन करत नसता तर यदाकदाचित गंगारामचा खूनही झाला नसता. सर्वसामान्य मुलांसारखी त्याची वर्तणूक राहिली असती, असं एका आजोबांनी हतबल होऊन सांगितलं.

चौकट : वस्तीवर गांजा येतोय कुठून

लमाण वस्तीवर गांजा येतोय कुठून, असं एका युवकाला विचारलं असता त्यांनी अहोे, आमचा तालुका कर्नाटकाशेजारीच आहे. तेथे गांजा रग्गड मिळतो. रोज कोणी ना कोणी तरी गावावरूनच इथं येते. त्यावेळी गांजा आणला जातो. मग तो अशाप्रकारे लहान मुलांपर्यंतही हातोहात पोहोचवला जातो. एका शिकल्या सवरलेल्या मुलाला ही वस्ती गांजामूक्त व्हावी, असं मनापासून वाटतंय. हा सारा प्रकार पोलिसांच्याही कानावर घातलाय. आता बघू पुढे काय होतंय, असं तो काळजीच्या सुरात बोलून गेला.