विद्यार्थ्यांकडून पर्यावरणपूरक मूर्ती

कऱ्हाडात कार्यशाळा : एन्व्हायरो फ्रेंडस नेचर क्लबचा उपक्रम; तेरा शाळांचा सहभाग

कऱ्हाड : येथील एन्व्हायरो फ्रेंडस नेचर क्लबच्या वतीने आयोजित इको फ्रेंडली गणेशमूर्ती बनविण्याच्या कार्यशाळेत शहरासह परिसरातील सर्व शाळांच्या विद्यार्थ्यांनी उत्स्फूर्तपणे सहभाग नोंदवला. पर्यावरणपूरक गणेशमूर्ती बनवून विद्यार्थ्यांनी पर्यावरणपूरक गणेशोत्सव साजरा करण्याचा संदेश दिला. या कार्यशाळेत शहरासह परिसरातील १३ विद्यालयांतील विद्यार्थी व शिक्षकांनी सहभाग घेतला.
येथील लाहोटी कन्या प्रशालेत एन्व्हायरो फ्रेंडस नेचर क्लबच्या वतीने इको फ्रेंडली गणेशमूर्ती बनविण्याची कार्यशाळा आयोजित करण्यात आली होती. या कार्यशाळेचे उद्घाटन नगराध्यक्षा अ‍ॅड. विद्याराणी साळुंखे यांच्याहस्ते झाले. अध्यक्षस्थानी मुख्याध्यापिका मंजिरी ढवळे होत्या. यावेळी क्लबचे उपाध्यक्ष प्रकाश खोचीकर, कार्याध्यक्ष चंद्रकांत जाधव, सचिव प्रसाद पावसकर, ए. आर. पवार, क्लबचे इको फ्रेंडली गणेशमूर्ती निर्मितीचे मार्गदर्शक महेश कुंभार यांची उपस्थिती होती.
नगराध्यक्षा अ‍ॅड. साळुंखे म्हणाल्या, ‘शहरात पर्यावरण संवर्धनाची चळवळ उभारणाऱ्या एन्व्हायरो फ्रेंडस नेचर क्लबच्या उपक्रमांमुळे कऱ्हाडची पर्यावरणपूरक शहर अशी ओळख निर्माण झाली आहे. पर्यावरण संवर्धनाच्या विविध उपक्रमांसह पर्यावरणपूरक गणेशोत्सवासाठी क्लबच्या उपक्रमांना पालिकेने नेहमीच पाठबळ दिले आहे.’
प्रकाश खोचीकर यांनी क्लबच्या वतीने पर्यावरणपूरक गणेशोत्सवासाठी राबविण्यात येत असलेल्या उपक्रमांची माहिती दिली. गणपतराव कणसे, शरद शिंंदे, रामभाऊ जोशी, आनंदा थोरात, रमेश ओझा, शिवाजीराव जाधव यांनी स्वागत केले. क्लबचे सचिव प्रसाद पावसकर यांनी सूत्रसंचालन केले. रमेश पवार यांनी आभार मानले. कार्यशाळेत शाळानिहाय विद्यार्थ्यांना आवश्यक त्या सुविधा पुरवण्यासाठी स्नेहल राजहंस व लीना गोसावी यांनी परिश्रम घेतले. (प्रतिनिधी)