शाळेच्या प्रत्येक वर्गात आरसा अन् गंध-पावडर

कऱ्हाडची पालिका शाळा क्र. ९ झाली ‘हायटेक’ : डिजिटल क्लासरूमसह स्पर्धा परीक्षा केंद्रही; चिमुकल्यांसाठी ‘प्रोजेक्टर’ अन् ‘सीपीयू’

संजय पाटील --कऱ्हाड  शाळेचा पहिला दिवस हुरहुर लावणारा असला तरी शाळेत पहिल्यांदाच पाऊल ठेवणाऱ्या चिमुकल्याला आईचा पदर सोडताना रडू आवरत नाही. दरवाजापर्यंत आलेला मुलगा शाळेत बसवून त्याला शिक्षणाची गोडी लावण्याचं काम शिक्षकांनाच करावं लागतं. कऱ्हाडच्या पालिका शाळा क्र. ९ मध्ये शिक्षकांनी ही जबाबदारी लिलया पेललीय. विद्यार्थ्यांना शिक्षणाची आवड निर्माण व्हावी आणि शाळेतच नव्हे तर वर्गातही ते रमावेत, यासाठी शाळेने विविध उपक्रम राबवलेत. या उपक्रमांमुळे येथील पटसंख्याही दिवसेंदिवस वाढत आहे.
कऱ्हाड येथे मंगळवार पेठेतील ज्योतिबा मंदिरापासून काही अंतरावर पालिकेची ९ क्रमांकाची शाळा आहे. १९८१ मध्ये या शाळेची स्थापना करण्यात आली. नुकतीच या शाळेने ३५ वर्षे पूर्ण केली आहेत. शाळेची इमारत जुनी असली तरी ती आकर्षक बनविण्यात आली आहे. रंगरंगोटीबरोबरच विद्यार्थ्यांसाठी आवश्यक असणाऱ्या प्राथमिक सोयी-सुविधांचीही येथे उभारणी करण्यात आली आहे. शाळा बदलत असतानाच काही महिन्यांपूर्वी या शाळेला ‘आयएसओ’ मानांकनाचे वेध लागले. त्यानंतर सर्वचजण कामाला लागले. आपली शाळा स्वच्छ आणि सुंदर बनविण्यासाठी प्रत्येक शिक्षकाने मोलाचा वाटा उचलला. त्यातूनच शाळा खऱ्या अर्थाने घडत गेली.
एकाच रंगाने रंगविलेल्या भिंती रंगीबेरंगी झाल्या. त्यावर सुविचार, चित्र रेखाटली गेली. छतावर तारांगण उमटलं. मैदान प्रशस्त आणि स्वच्छ झालं. प्रवेशद्वारात झेंडे फडफडू लागले. पायऱ्यांनाही रंग भरला. भिंती बोलक्या झाल्या. फळ्याभोवतीही आकर्षक रंगसंगती चढली; पण फक्त एवढ्यावरच न थांबता शिक्षकांनी प्रत्येक वर्ग सजवला. वर्गाच्या भिंतीवरही सुभाषिते रेखाटली गेली. बाराखडीपासून बोधकथांपर्यंत सर्वकाही भिंतींवरच उमटलं. ज्यामुळे या रंगीबेरंगी आणि दर्जात्मक शिक्षण देणाऱ्या शाळेकडे पालकांचा ओढा वाढला. सध्या या शाळेचा पटही पूर्वीपेक्षा कित्येक पटींनी वाढला आहे. मात्र, पट वाढला आणि शाळेला ‘आयएसओ’ मानांकन मिळाले म्हणून येथील शिक्षक थांबले नाहीत.


तुमचीही शाळा येऊ शकते मालिकेत..
सातारा जिल्हा ‘एज्युकेशन हब’ म्हणून महाराष्ट्रात ओळखला जाऊ लागलाय. आज मंत्रालयासारख्या उच्च विभागातही सर्वाधिक सातारकरच मोठ्या आत्मविश्वासाने काम करताना दिसतायत. भारताच्या बाहेरही ‘ग्लोबल सातारकर’ म्हणून मोठ्या कौतुकानं ओळखली जाणारी मंडळी तयार झाली ती इथल्या शाळेतच. म्हणूनच अशा शाळांमधील वेगळ्या उपक्रमाला सलाम करण्यासाठी ‘लोकमत’नं सुरू केलीय ही नवी मालिका... तुमच्याही शाळेत काही वेगळे उपक्रम राबविले जात असतील तर उचला मोबाईल अन् करा कॉल.
संपर्क : 9850 384 376

आजचा राजकुमार...
...आजची राजकुमारी!
दैनंदिन स्वच्छतेची आवड निर्माण व्हावी, यासाठी ‘आजचा राजकुमार’, ‘आजची राजकुमारी’ उपक्रम.
विद्यार्थ्यांच्या अभिव्यक्ती स्वातंत्र्यास वाव मिळावा, यासाठी निबंध, वक्तृत्व स्पर्धा.
औषधी वनस्पतींची माहिती व्हावी, यासाठी पर्यावरण मित्र शाळा उपक्रम.
विद्यार्थ्यांना वेळेत शाळेमध्ये येण्याची सवय लागावी, यासाठी उपस्थिती ध्वज उपक्रम.
इयत्ता दुसरीपासून विद्यार्थ्यांना स्वत:हून प्रयोग करता यावेत, यासाठी अद्ययावत प्रयोगशाळा.


शाळा व परिसर सुशोभित करण्याबरोबरच गुणवत्ता वाढविसाठी आमचा प्रयत्न आहे. शाळेला आयएसओ मानांकन मिळवून देण्यात येथील शिक्षक, पालक व नागरिकांचा हातभार आहे.
- अरविंद पाटील, मुख्याध्यापक


वर्गात पंखा अन् खिडक्यांना पडदे...
विद्यार्थी वर्गामध्ये रमावेत, यासाठी प्रत्येक वर्ग सजविण्यात आला आहे. तसेच प्रत्येक वर्गात आरसा, गंध, टिकली, पावडर, कंगवा, नेलकटर आदींची सोय करण्यात आली आहे. या आरशात पाहताना चिमुकली अक्षरश: हरखून जातात. त्याचबरोबर वर्गामध्ये वीजबल्ब, पंखा व खिडक्यांना आकर्षक पडदेही बसविण्यात आले आहेत.