एका फ्लॅटमुळे संपूर्ण अपार्टमेन्ट बदनाम!

‘हाय प्रोफाइल’ देहव्यापार : फोफावणाऱ्या विषवल्लीच्या मुळावर घाव घालण्याचे पोलिसांपुढे आव्हान

सातारा : शहरात तीन महिन्यांत दोन ठिकाणी फ्लॅटमध्ये सुरू असलेला ‘हाय प्रोफाइल’ देहव्यापार उघड झाल्याने अशा अपार्टमेन्टमधील रहिवाशांच्या समस्या, तक्रारी पुढे येऊ लागल्या आहेत. एका फ्लॅटमुळे संपूर्ण अपार्टमेन्टची होणारी बदनामी आणि नागरिकांना भोगाव्या लागणाऱ्या ‘साइड इफेक्ट्स’वर चर्चा सुरू झाली असून, वेगाने फोफावणाऱ्या या विषवल्लीची पाळेमुळे खणण्यात पोलिसांना यश मिळणार की ‘तांत्रिक’ खतपाणी मिळून त्या वाढतच राहणार, अशी साधार भीती नागरिकांमध्ये आहे.
शुक्रवार पेठेतील अपार्टमेन्टमध्ये छापा टाकून बुधवारी स्थानिक गुन्हे शाखेने दोघांना अटक केली. अडीच महिन्यांंपूर्वी विसावा नाका परिसरातील अपार्टमेन्टमध्ये अशीच कारवाई झाली होती. शाहूनगर, शाहूपुरी, सदर बझार भागातही कारवाया झाल्या आहेत. असे आणखी काही अड्डे बड्यांचे चोचले पुरवीत असल्याची उघड चर्चा आहे. एका फ्लॅटमुळे संपूर्ण इमारतीकडे बघण्याचा लोकांचा दृष्टिकोन बदलत असल्याने अशा इमारतींमध्ये राहणाऱ्या महिलांना भेदक नजरांचा तर पुरुषांना अरेरावीचा सामना करावा लागतो.
कर्ज काढून फ्लॅट घेणाऱ्या मध्यमवर्गीयांना अत्यंत अपरिचित, त्रासदायक वातावरण अशा अपार्टमेन्ट्सच्या परिसरात तयार होते. इमारतीत ये-जा करणाऱ्या प्रत्येक महिलेकडे ‘त्याच’ नजरेने पाहणारे इमारतीभोवती घोटाळत असतात. रहिवाशांनी त्यांच्याकडे वैतागलेल्या नजरेने पाहिल्यास पार्किंगमधील गाड्यांची नासधूस करण्यापर्यंत संबंधितांची मजल जाते. घराबाहेर पडताना महिलांच्या अंगावर काटा उभा राहतो. काही ठिकाणी वादावादी, मारहाणीचे प्रकारही घडले आहेत.
सरकारी कर्मचारी, बँक कर्मचारी, औद्योगिक वसाहतीतील कर्मचारी, स्वयंरोजगार करणारे, खासगी नोकरी करणारे पै-पै जुळवून फ्लॅट घेतात आणि अपार्टमेन्टमध्ये असे प्रकार सुरू झाले की नखशिखान्त हादरतात. अनेक ठिकाणी देहव्यापाराच्या जोडीने गुंडगिरी बोकाळत जाते. काही अपार्टमेन्टमधील रहिवाशांनी फ्लॅट विकून दुसरीकडे घर घेतल्याचीही उदाहरणे आहेत. त्यामुळे वेगाने पसरत चाललेले हे तण समूळ नष्ट करावे, या मागणीचा रेटा वाढत आहे. (प्रतिनिधी)
पोलिसांना खरेच माहीत नसते?
सभ्य नागरिकांच्या वसाहतीत प्रतिष्ठितांची ऊठ-बस असलेली अशी ठिकाणे तयार होतात, गुन्हेगारांची वर्दळ वाढते, शांतता बिघडते आणि या साऱ्याची पोलिसांना माहितीच नसते, असे म्हणणे धाडसाचे ठरेल. नागरिक कधी इमारत बांधणाऱ्या बिल्डरकडे तर कधी परिसरातील नेत्याकडे दाद मागण्याचा प्रयत्न करतात. पण ‘पोलिसांनीच कडक भूमिका घेतल्याखेरीज आमचे भोग संपणार नाहीत,’ असे नागरिक सांगतात.
माहिती द्या;
नाव गुप्त राखू
अमुक एका भागात असे कृत्य चालते अशी मोघम माहिती पोलिसांना दिली जाते. नेमकी इमारत, नेमका फ्लॅट अशी चपखल माहिती मिळत नाही. नागरिकांनी पुढे येऊन नेमकी माहिती दिली तर पोलिसांना कारवाई करणे सोपे जाईल. माहिती देणाऱ्याचे नाव शंभर टक्के गोपनीय राखले जाईल.
- पद्माकर घनवट,
पोलीस निरीक्षक, स्थानिक गुन्हे शाखा