वाहने सावकाश चालवा; मोकाट जनावरे वाढली!

सातारा : सातारा शहरातील वाहनधारकांना सध्या मोकाट जनावरांचा मोठा मनस्ताप सहन करावा लागत आहे. शहरातील प्रमुख चौक, भाजीमंडई व बाजारपेठेत मोकाट जनावरे रस्त्यावरच ठाण मांडून बसत असल्याने वाहतूक कोंडी होत आहे. मोकाट जनावरांचे कोणीच वाली नसल्याने या जनावरांचे करायचे काय? तक्रार कोणाकडे करायची? असा प्रश्न वाहनधारकांना नेहमीत पडत असतो.

मोकाट जनावरे खाद्याच्या शोधार्थ शहरात मुक्तसंचार करतात. अशा जनावरांना पकडून कोंडवाड्यात ठेवण्याची मागणी नागरिकांमधूून अनेकदा करण्यात आली आहे; परंतु पालिका प्रशासनाने ही बाब अद्याप गांभीर्याने न घेतल्याने भटक्या जनावरांचा वावर वाढतच चालला आहे.

(चौकट)

मोकाट जनावरांचा वाली कोण?

शहरातील मोकाट श्वान, गायी, म्हशी यांना पकडून कोंडवाड्यात अथवा शहरापासून दूर सोडणे गरजेचे आहे. याबाबत पालिका प्रशासनाने उपाययोजना करणे क्रमप्राप्त आहे; परंतु पालिका ही बाब गांभीर्याने घेत नसल्याने मोकाट जनावरांना कोणी वालीच उरलेला नाही.

(चौकट)

वर्षभरात एकही कारवाई नाही

सातारा शहरात भटक्या गायी, म्हशी, श्वान, तसेच गाढवांची संख्या वाढू लागली आहे. काही शेतकरी आपली पाळीव जनावरेही खाण्यासाठी मोकळी सोडून देतात. या जनावरांचा मोठा त्रास वाहनधारकांना सहन करावा लागतो. असे असूनही पालिका प्रशासनाकडून वर्षभरात एकही ठोस कारवाई करण्यात आली नाही.

(चौकट)

या मार्गावर वाहने जपून चालवा

राधिका रस्ता

बाजार समिती परिसर

राजपथ

जुना मोटार स्टॅँड

राजवाडा-समर्थ मंदिर मार्ग

(कोट)

पालिका ठोस पावले उचलणार

शहरात मोकाट जनावरांची संख्या वाढू लागली आहे. ही जनावरे वाहतुकीला अडथळा ठरत आहेत. शिवाय अपघातही होत आहेत. पालिकेकडून भटक्या श्वानांचे निर्बीजीकरण केले जाणार आहे. इतर भटक्या जनावरांबाबतही योग्य त्या उपाययोजना केल्या जातील.

-प्रताप राठोड, आरोग्य निरीक्षक

फोटो : २२ जावेद खान