सातारा: दैनंदिन जीवनामध्ये अनेकांना वेगवेगळ्या सवयी लागून राहतात. अशा काही सवयींमुळे काहींना त्रास होतो तर काहींना त्यातून आनंद मिळतो. अशाचप्रकारे डॉ. प्रदीप कालेकर यांना हटके आणि अनोखी सवय लागलीय. ती म्हणजे डोक्यात हेल्मेट घालण्याची. दुचाकी सुरू करण्यापूर्वी त्यांच्या डोक्यात हेल्मेट नसले तर त्यांना गाडी चालविताच येत नाही, अशी त्यांची धारणा झालीय. त्यामुळे हेल्मेटविना डॉक्टरांची गाडी कधीच पुढे सरकतच नाही. ही अनोखी सवय मात्र, डॉक्टरांची सुरक्षा कवच बनलीय.
जिल्हा शासकीय रुग्णालयात प्रदीप कालेकर हे डोळ्यांचे डॉक्टर म्हणून कार्यरत आहेत. एकतीस वर्षांपूर्वी ते सांगली जिल्ह्यातील जत येथे प्राथमिक आरोग्य केंद्रामध्ये कार्यरत होते. त्यावेळी त्यांना दुचाकीवरून रुग्णालयात ये-जा करावे लागत होते. त्यावेळी त्यांनी हेल्मेट घेतले. मात्र, गाडी चालविताना हेल्मेट डोक्यात घातल्यानंतर सुरुवातीला मान आणि डोके त्यांचे दुखू लागले. परंतु हेल्मेट हे सुरक्षा कवच आहे, असे मानून त्यांनी प्रवासदरम्यान हेल्मेटची सवय करून घेतली. ही अनोखी सवय त्यांना प्रवासादरम्यान स्वस्थ बसू देत नाही. ही सवय इतकी लागली आहे की, हेल्मेटविना त्यांना गाडी चालविताच येत नाही. आतापर्यंत ३१ वर्षे त्यांची सेवा झाली आहे. या कालावधीत त्यांनी तब्बल ३२ हेल्मेट वापरली आहेत. काही हेल्मेट चोरीला गेली तर काही हेल्मेट पडून खराब झाली. त्यामुळे रोजच्या कपड्यांसारखी त्यांच्याकडे हेल्मेट तीन ते चार शिल्लक असतात. दुचाकी चालविताना हेल्मेट डोक्यात घालणे हे अत्यंत गरजेचे आहे. शासनाने अनेकदा हेल्मेट सक्ती केली. मात्र, अनेकजण हेल्मेटविनाच गाडी चालवतात. त्यामुळे अनेक दुचाकीस्वारांना आपला जीव गमवावा लागलाय. डॉ. कालेकर यांची अनोखी सवय इतर दुचाकीस्वारांना खरे तर प्रेरणादायी अशीच आहे. मान, डोके दुखतेय, सांभाळायचे कसे, चोरीला जाईल, अशा अनेक कारणांमुळे दुचाकीस्वार हेल्मेट घालत नाहीत. परंतु वेळ सांगून येत नाही. कधी आपल्या मृत्यूला हेल्मेट नसणे कारणीभूत ठरेल, हे स्वप्नातही वाटणार नाही. त्यामुळे डॉ. कालेकरही इतर दुचाकीस्वारांना हेल्मेट घालण्याचा वारंवार सल्ला देत आहेत.
चौकट : मुलाच्या मृत्यूची मनात सल!
डॉ. प्रदीप कालेकर यांचा अठरा वर्षांचा मुलगा ओंकार कालेकर याचाही काही वर्षांपूर्वी दुचाकी अपघातात मृत्यू झाला. स्वत: ला हेल्मेटचे महत्त्व उमगल्याने त्यांनी स्वत:साठी हेल्मेटला सुरक्षा कवच बनवले. पण मुलगा घटनेदिवशी घाईगडबडीत हेल्मेट घालणे विसरला आणि त्यांच्यापासून कायमचा निघून गेला. ही सल त्यांच्या मनात आजही कायम घर करून आहे.