जिल्ह्यात पावसाचा जोर वाढला; नवजाला १४० मिलिमीटरची नोंद

सातारा : जिल्ह्यात दोन दिवसांपासून पावसाचा जोर वाढला आहे. पश्चिम भागातील नवजा येथे सर्वाधिक १४० मिलिमीटर पावसाची नोंद झाली, तर पूर्व दुष्काळी भागात अनेक ठिकाणी पाऊस दमदार कोसळला. पश्चिम भागातील पावसामुळे धरणांत पाण्याची आवक वाढत आहे. कोयनेत ९५.१५ टीएमसी पाणीसाठा झाला आहे.

जिल्ह्यात पाच दिवसांपासून पाऊस होत आहे. मात्र, मागील एक महिना पाऊस अत्यल्प पडला. जिल्ह्यात जुलै महिन्याच्या मध्यावर जोरदार पाऊस झाला होता. त्यावेळी पश्चिम भागात तर धुवाँधार पावसामुळे जनजीवन विस्कळीत झाले होते. रस्ते वाहून गेले होते. तसेच जमिनी खचल्या होत्या. हा पाऊस लोकांवर काळ बनून आला होता, तर अवघ्या तीन दिवसांत कोयना, नवजा आणि महाबळेश्वरला विक्रमी पाऊस झाला होता. त्याचबरोबर कोयना धरणात इतिहासात प्रथमच मोठ्या प्रमाणात पाण्याची आवक झाली. २४ तासांत १६ टीएमसीने पाणीसाठा वाढला होता. तसेच इतर धरणांतही पाणी वेगाने वाढले होते. मात्र, ऑगस्ट महिन्यात एकदम कमी प्रमाणात पाऊस पडला. त्यामुळे धरणे पूर्णपणे भरली नाहीत, तर पूर्वेकडील खरीप हंगामातील पिके पावसाअभावी वाळू लागली होती. त्यामुळे धरणे भरणार का ? अशी चिंता लागली होती. तसेच खरीप हंगाम वाया तर जाणार नाही ना ? अशी भीतीही व्यक्त होत होती. पण, गेल्या पाच दिवसांपासून संपूर्ण जिल्ह्यात पावसाळी वातावरण तयार झाले आहे. अनेक ठिकाणी दमदार पाऊस होत आहे.

जिल्ह्यातील पश्चिम तसेच पूर्व भागातही दमदार पाऊस होत आहे. एक महिन्यानंतर प्रथमच चांगला पाऊस होत असल्याने पिकांना फायदा होणार आहे. पूर्व दुष्काळी भागातील माण, खटाव, फलटण तालुक्यात अनेक ठिकाणी चांगला पाऊस झाला. यामुळे खरीप हंगामातील पिकांना फायदा झाला. माण तालुक्यातील अनेक गावांच्या ओढ्यांना पाणी येऊ लागले आहे. तसेच बंधाऱ्यात पाणीसाठा होत आहे. तरीही अजून मोठ्या पावसाची प्रतीक्षा कायम राहणार आहे.

चौकट :

कोयनेला ६७ मिलिमीटर पाऊस...

मंगळवारी सकाळपर्यंतच्या २४ तासांत कोयना येथे ६७ मिलिमीटर पाऊस पडला, तर जूनपासून आतापर्यंत ३,७१४ मिलिमीटर पावसाची नोंद झाली आहे. तसेच नवजा येथे १४० आणि आतापर्यंत ४,९९४ व महाबळेश्वरला ११, तर यावर्षी आतापर्यंत ४,९७९ मिलिमीटर पाऊस झाला आहे. कोयना धरणात सकाळच्या सुमारास ९५.१५ टीएमसी पाणीसाठा झाला होता, तर २४ तासांत ७,४७४ क्यूसेक वेगाने पाणी येत होते. धरणात येणाऱ्या पाण्याची आवक वाढली आहे.

............................................................