ट्रकला धडक देणाऱ्या पिकअपचालकावर गुन्हा

सातारा : साताऱ्यानजीक राष्ट्रीय महामार्गावर ट्रकला पाठीमागून धडक देऊन अपघात केल्याप्रकरणी पिकअपचालक बाबासाहेब लक्ष्मण गोरे (रा. पाल, ता. कराड) याच्यावर सातारा तालुका पोलीस ठाण्यात गुन्हा दाखल झाला आहे.

याबाबत पोलिसांनी दिलेली माहिती अशी, यातील तक्रारदार ट्रकचालक अंकुश रावण रुपनूर (रा. रेणावळे, ता. जत, जि. सांगली) हे दि. १५ रोजी साताऱ्यानजीक म्हसवे गावच्या हद्दीत डीमार्टसमोरून पहाटे ३ च्या सुमारास त्यांच्या ताब्यातील ट्रक (एम. एच. १२ एचसी ७६१९) घेऊन सांगलीच्या दिशेने निघाले होते. त्या वेळी त्यांच्या ट्रकला पिकअपने (एम. एच. ५० एन ०११७) पाठीमागून धडक दिली.

ही धडक खूप जोरात होती. त्यामुळे पिकअपचा पुढील भाग चेपल्याने चालकासह आणखी दोनजण आत अडकून पडले होते. त्या वेळी ट्रकचालक रुपनूर यांनी पिकअपचालक गोरे याच्यासह जखमी सुप्रिया आनंद गोडसे व आनंद गोडसे (रा. निवडे, ता. पाटण) यांना बाहेर काढून उपचारासाठी हॉस्पिटलला पाठवून दिले. दरम्यान, त्यांनी पिकअपचालक गोरे याने ट्रकला धडक दिल्याने ७५ हजार तसेच पिकअपचेही दीड लाखाचे नुकसान झाले व दोघे जखमी झाले असल्याने त्याच्याविरुध्द तक्रार दिली आहे. या अपघाताचा पुढील तपास पोलीस नाईक महांगडे करत आहेत.