मलकापूर : कोरोनाच्या पार्श्वभूमीवर जिल्हाधिकाऱ्यांनी लागू केलेल्या कडक निर्बंधाना मलकापुरात संमिश्र प्रतिसाद मिळाला. नेमके काय करायचे या विवंचनेत सकाळपासूनच शहरात काही व्यावसायिक दुकानाचे शटर अर्ध्यावरच उघडून बसले होते; तर अनेकांच्या दुकानांचे शटर पूर्ण उघडे होते. मोजक्याच दुकानदारांनी शटर बंद ठेवले होते. त्यामुळे शहरात जिल्हाधिकाऱ्यांच्या निर्णयाबाबत व्यावसायिकांसह नागरिकांमध्ये संभ्रम असल्याचे चित्र सर्वत्र दिसत होते.
जिल्ह्यातील कोरोनाची परिस्थिती विचारात घेऊन आवश्यक सेवा वगळता इतर सर्व दुकाने बंदचा सुधारित आदेश जिल्हाधिकाऱ्यांनी काढला होता. त्यानुसार मलकापूर शहरातील काही व्यावसायिकांनी सकाळपासूनच अर्ध्यावर शटर ठेवून बघ्याची भूमिका घेतल्याचे चित्र होते. जिल्हाधिकाऱ्यांच्या आव्हानाला प्रतिसाद देत शहरातील काही व्यावसायिकांनी शटर डाऊन केले होते. मात्र, मलकापुरात कडक निर्बंधांना काही व्यावसायिकांनी चांगला प्रतिसाद देत दुकाने बंद ठेवली; तर काही व्यवसायिकांनी शटर अर्ध्यावरच ठेवून आपले व्यवसाय सुरू ठेवल्याचे चित्र होते. महामार्गासह प्रमुख राज्यमार्गांवर काही प्रमाणात वाहतूक सुरू होती.
कऱ्हाड-ढेबेवाडी रस्त्यालगत व जखिणवाडी रस्त्यांवर अनेक ठिकाणी कोरोनाची भीती न बाळगता भाजी विक्रेत्यांनी मंडई थाटली होत; तर खरेदीदारही घोळका करून खरेदी करीत होते. त्यामुळे मिनी लॉकडाऊनला मलकापूर शहरासह महामार्गावर संमिश्र प्रतिसाद मिळाला असल्याचे चित्र होते.