विनापरवाना फ्लेक्समुळे शहर विद्रुप

सातारा : सातारा शहरात विनापरवाना फ्लेक्स बोर्ड लावणाऱ्यांची संख्या दिवसेंदिवस वाढू लागली असून, शहरही विद्रुप होऊ लागले आहे. या फुकट्या जाहिरातदारांमुळे पालिकेचा लाखो रुपयांचा महसूल मात्र बुडत आहे.

सातारा हे जिल्ह्याचे मुख्य ठिकाण आहे. विविध शासकीय कार्यालय, महाविद्यालये, औद्योगिक वसाहत यांसह अनेक खासगी बॅँका व संस्थांची मुख्य कार्यालये या ठिकाणी आहेत. येथील बाजारपेठही सर्वांत मोठी असल्याने ग्रामीण भागातील नागरिकांची येथे सतत रेलचेल सुरू असते. या नागरिकांना आकर्षित करण्यासाठी काही जाहिरातदारांकडून पालिका व पोलीस प्रशासनाची रीतसर परवानगी घेऊन फ्लेक्स बोर्ड लावले जातात. मात्र, अनेकांना याचा विसर पडल्याचे दिसते.

पालिकेची परवानगी न घेता शहरातील मुख्य रस्ते, चौक, विजेचे खांब, शासकीय इमारती, फूटपाथ तसेच झाडांवर फ्लेक्सबोर्ड लावले जात आहेत. ही संख्या दिवसेंदिवस वाढू लागल्याने शहराचे रूप बकाल होऊ लागले आहे. पालिकेकडून फ्लेक्सबोर्ड जप्तीची कारवाई सातत्याने केली जात असली तरी याचा फारसा उपयोग होताना दिसत नाही. काही दिवसांत परिस्थिती ‘जैसे थे’ होत असल्याने पालिकेला लाखोंच्या महसुलावर पाणी सोडावे लागत आहे.

(चौकट)

पालिकेकडून कारवाई

- शहरात सार्वजनिक ठिकाणी विनापरवाना फ्लेक्स बोर्ड लावणाऱ्यांवर पालिका प्रशासनाकडून सातत्याने कारवाई केली जात आहे. संबंधितांचे फ्लेक्स बोर्डही जप्त केले जातात.

- पालिकेकडून दंडात्मक कारवाई होत नसल्याने संबंधित दुकानदार, व्यावसायिक निर्धास्त झाले आहेत. कारवाई थांबली की, संबंधितांकडून पुन्हा एकदा आहे त्या जागेवर फ्लेक्स बोर्ड लावले जातात.

- शहरातील राजपथ, कर्मवीर पथ, राजवाडा, खणआळी, बसस्थानक परिसरात फुकट्या जाहिरातदारांची संख्या सर्वाधिक आहे.

(चौकट)

वार्षिक दीड लाखांचा महसूल

सातारा पालिकेला जाहिरात फलकांच्या माध्यमातून वार्षिक चार ते पाच लाखांचा महसूल मिळणे अपेक्षित आहे. मात्र, विनापरवाना जाहिरात फलक लावणाऱ्यांची संख्या अधिक असल्याने पालिकेच्या तिजोरीत वर्षाकाठी केवळ दीड ते दोन लाखांचा महसूल जमा होत आहे. ही बाब गांभीर्याने घेऊन पालिका प्रशासनाला ठोस पावले उचलावी लागणार आहेत.

(कोट)

विनापरवाना फ्लेक्स बोर्ड लावणाऱ्यांवर वेळोवेळी कारवाई केली जात आहे. जर कोणी विनापरवानगी जाहिरात फलक लावले असतील तर ते त्वरित काढून घ्यावे, अन्यथा संबंधितांवर कठोर कारवाई केली जाईल.

- प्रशांत निकम

अतिक्रमण विभागप्रमुख

(कोट)

शहरातील अशी एकही गल्ली व रस्ता नाही जिथे जाहिरात फलक दिसणार नाही. इमारती, दुकाने, विजेचे खांब एवढंच काय तर झाडांवरदेखील असे फलक झळकू लागले आहेत. या फलकामुळे सातारा शहराचे रूप मात्र बकाल होऊ लागले आहे.

- श्रीरंग काटेकर, सातारा

फोटो : जावेद खान