सातारा: पुणे-बेंगलोर राष्ट्रीय महामार्गावर येथील शेंद्रे पुलावर कारने ट्रकला पाठीमागून जोरदार धडक दिल्याने कारमधील चालक ठार झाला. हा अपघात रविवारी पहाटे साडेतीनच्या सुमारास झाला.
आकाश संजीव सूर्यवंशी (वय ३३, रा. औरनाळ, पो. धुंडगे ता. गडहिंग्लज) असे अपघातात ठार झालेल्या कार चालकाचे नाव आहे. याबाबत अधिक माहिती अशी, कार चालक आकाश सूर्यवंशी हा कोल्हापूरहून प्रती बालाजीला काही भक्तांना घेऊन निघाला होता. पहाटे साडेतीनच्या सुमारास शेंद्रे येथे आल्यानंतर समोर असलेल्या ट्रकला कारची जोरदार धडक बसली. ही धडक इतकी भीषण होती की, कारची पुढील बाजू ट्रकच्या मागच्या बाजूमध्ये पूर्णपणे अडकली. या अपघातानंतर कारमधील सर्वजण कसे-बसे बाहेर आले. मात्र, चालक आकाश सूर्यवंशीला बाहेर काढणे अवघड झाले होते. अखेर नागरिकांनी शर्तीचे प्रयत्न करून आकाशला तत्काळ साताºयातील खासगी दवाखान्यात दाखल केले. परंतु उपचारादरम्यान त्याचा मृत्यू झाला. सातारा तालुका पोलीस ठाण्यात या अपघाताची नोंद झाली आहे.