मुंबई - खासदार उदयनराजे भोसलेंची राष्ट्रवादी काँग्रेसकडून अद्याप उमेदवारी निश्चित नाही. मात्र, त्यांनी आपल्या संपर्क दौऱ्याला सुरुवात केली आहे. आपल्या ट्विटर अकाऊंटवरुन त्यांच्या याबाबत माहिती दिली आहे. उदयनराजेंनी बुधवारी सातारा लोकसभा मतदारसंघातील जावळीतून आपल्या संपर्क दौऱ्याला सुरुवात केली आहे. या दौऱ्यातला उदयनराजेचा एक फोटो चांगलाच व्हायरल होत आहे. तर, या दौऱ्यामुळे राजेंनी जणू लोकसभेचं रणशिंगच फुंकल्याचं बोललं जात आहे.
उदयनराजे आपल्या मतदारसंघातील सर्वसामान्य लोकांशी असलेल्या जवळीकतेनही परिचीत आहेत. सामान्य लोकांसमवेत कुठेही बसणे, गप्पा मारणे, चर्चा करणे ही त्यांची खास वैशिष्टे. शेतीच्या बांधावर बसण्यापासून ते राजसिंहासनावर बसणारा राजा अशी त्यांनी ओळख आहे. उदयनराजेंची हीच ओळख पुन्हा एकदा अधोरेखित झाली आहे. उदयनराजेंनी आपला संपर्क दौरा सुरू केला असून बुधवारी जावळी तालुक्यात भेटी दिल्या. त्यावेळी, ज्येष्ठांपासून ते बालकांपर्यंत त्यांनी अनेकांशी संवाद साधला. या दौऱ्यात एका आजीबाईंनी चक्क मुका घेऊन उदयराजेंना दाद दिली. दरवेळी, आपल्या कार्यकर्त्यांना आय लव्ह यू म्हणणारे आणि कधीकधी कार्यकर्त्यांचा मुका घेणाऱ्या उदयनराजेंचा हा मुका म्हणजे थोरांचे आशीर्वाद व प्रेम आहे.
वडिलधाऱ्या, वयस्कर लोकांचे मिळणारे आशीर्वाद व प्रेम जनतेसाठी अविरत काम करण्याची ताकद देते, असे ट्विट करत उदयनराजेंनी हा फोटो आपल्या ट्विटर अकाऊंटवरुन शेअर केला आहे. दरम्यान, बुधवारी आपल्या संपर्क दौऱ्यावेळी कुडाळ येथील एका कार्यक्रमात खासदार उदयनराजे भोसले व आमदार शिवेंद्रसिंहराजे भोसले हे पुन्हा एकदा आमने-सामने आले. यावेळी उदयनराजेंनी शिवेंद्र्रसिंहराजेंचा खांदा दाबला. यावर शिवेंद्र्रसिंहराजेंनी ‘माझा खांदा सारखा का दाबता ? मी अजूनही फिट आहे. हवं तर प्रात्यक्षिक करून दाखवतो,’ असं म्हणत उदयनराजेंना कोपरखळी मारली. दोन्ही राजेंमध्ये झालेल्या या डायलॉगबाजीची तालुक्यात चांगलीच चर्चा रंगली. त्यानंतर, आता उदयनराजेंचा आजीबाईंनी घेतलेल्या मुक्याचा हा फोटो चांगलाच व्हायरल होत आहे.