औंधमध्ये प्राचीन, अर्वाचीन नाणी प्रदर्शन!

औंध : औंध येथील शिवसंकल्प प्रतिष्ठानच्यावतीने शिवजयंतीनिमित्त किमान २६०० वर्षांपूर्वीची प्राचीन व अर्वाचीन दुर्मिळ नाण्यांचे प्रदर्शन दि. १७ व १८ फेब्रुवारी रोजी औंध येथे भरविण्यात येणार असल्याची माहिती अध्यक्ष नीलेश खैरमोडे यांनी दिली.

शिवसंकल्प प्रतिष्ठानकडून नेहमीच विधायक कार्यक्रम राबविले जातात. वृक्षारोपण, रक्तदान शिबिर, स्वच्छता मोहीम, पशु-पक्ष्यांच्या अन्न-पाण्याची सोय... असे विविध प्रकारचे कार्यक्रम राबविले जातात. यंदा शिवजयंती उत्सवानिमित्त हजारो वर्षांपूर्वीचा वैभवशाली इतिहास प्रत्यक्ष पाहायला व अनुभवायला मिळणार आहे. दुर्मिळ नाण्यांच्या प्रदर्शनात शक, कुषाण, सातवाहन, यादव, चालुक्य, शुंग, मौर्य, मराठा या पराक्रमी वंशातील अनेक सम्राटांची नाणी, तसेच मुघल, निजाम, ब्रिटिश व इतर मुस्लिम राज्यकर्त्यांची नाणीही पाहायला मिळणार आहेत. तसेच चंद्रगुप्त मौर्य, सम्राट अशोक, अकबर, औरंगजेब, शहाजहान, छत्रपती शिवाजी महाराज, संभाजी महाराज, राजाराम महाराज, शाहू महाराज यांच्या काळातील नाणी या प्रदर्शनात पाहायला मिळतील. तरी औंध पंचक्रोशीतील नागरिकांनी, विद्यार्थ्यांनी प्रदर्शनाचा लाभ घ्यावा, असे आवाहन प्रतिष्ठानच्यावतीने करण्यात आले आहे.

फोटो आहे.. १६औंध०१

औंध येथे शिवसंकल्प प्रतिष्ठानच्यावतीने शिवजयंतीनिमित्त किमान २६०० वर्षांपूर्वीच्या प्राचीन व अर्वाचीन दुर्मिळ नाण्यांचे प्रदर्शन भरविण्यात येणार आहे.