कोल्हापूर नाक्यावर वाहतुकीची पर्यायी व्यवस्था

दरम्यान, पृथ्वीराज चव्हाण यांनी कोल्हापूर नाका येथे प्रत्यक्ष भेट देऊन परिस्थितीची पाहणी केली. यावेळी प्रांताधिकारी उत्तम दिघे, उपविभागीय पोलीस अधिकारी रणजित पाटील, राष्ट्रीय महामार्गचे अधिकारी वसंत पंधरकर, वरिष्ठ पोलीस निरीक्षक बी. आर. पाटील, वाहतूक शाखेच्या सहाय्यक निरीक्षक सरोजिनी पाटील, इंद्रजित चव्हाण, राहुल चव्हाण आदी उपस्थित होते.

या भेटीनंतर माजी मुख्यमंत्री आमदार पृथ्वीराज चव्हाण यांनी सर्व अधिकाऱ्यांची बैठक घेऊन कामाचा आढावा घेतला. राष्ट्रीय महामार्गाच्या अधिकाऱ्यांनी कोल्हापूर नाका येथे उभारण्यात येणाऱ्या उड्डाणपुलाचा आराखडा आमदार चव्हाण यांच्यासमोर सादर केला. हा उड्डाण पूल साडेतीन किलोमीटर लांबीचा असणार आहे. सातारा-कागल या लेनवर महामार्गावरील सर्वांत अधिक लांबीचा हा पूल असणार आहे.

कोल्हापूर नाका येथील वाढते अपघात व वाहतूक कोंडी यावर नवीन उड्डाणपूल होईपर्यंत तत्काळ पर्यायी वाहतूक व्यवस्था होण्यासाठी सूचना व आराखडा तयार करावा, अशी सूचना यावेळी आमदार चव्हाण यांनी दिली. या सर्व विभागांची पुढील दहा दिवसांत पुन्हा बैठक घेऊन पर्यायी व्यवस्थेचा निर्णय घेतला जाईल तसेच नवीन उड्डाण पुलाबाबत केंद्रीय मंत्री व सचिवांसोबत बैठक घेऊन पाठपुरावा करणार असल्याचेही आमदार चव्हाण यांनी सांगितले.

- चौकट

पूल सहापदरी; उपमार्ग चौपदरी

पूल सिंगल पिलर रचनेवर उभारला जाणार असून तो सहापदरी असणार आहे तसेच या उड्डाणपुलाखालील उपमार्ग चौपदरी असणार आहे. हॉटेल पंकज येथून एनपी मोटर्सपर्यंत हा पूल असणार आहे. या साडेतीन किलोमीटर लांबीच्या पुलामुळे कऱ्हाड व मलकापूर शहरातील वाहतूक नियंत्रित करता येणार आहे तसेच या दोन शहराच्या वाहतुकीमुळे महामार्गावरील होणारे अपघात टाळता येऊ शकतील.

फोटो : ०६केआरडी०२

कॅप्शन : कऱ्हाडच्या कोल्हापूर नाक्यावर माजी मुख्यमंत्री आमदार पृथ्वीराज चव्हाण यांनी पाहणी केली. यावेळी प्रांताधिकारी उत्तम दिघे, पोलीस उपअधीक्षक रणजित पाटील, बी. आर. पाटील आदी उपस्थित होते.