Satara: प्रेमविवाह करणाऱ्या तरुणासह नातेवाईकांना घरात घुसून मारहाण, दहा जणांवर गुन्हा नोंद

उंब्रज : अंधारवाडी ता. कऱ्हाड येथे प्रेमविवाह करणाऱ्या एकास त्याच्यासह वडील, चुलते - चुलती व भाऊ यांना घरात घुसून मारहाण करण्याची घटना घडली आहे. या मारहाण प्रकरणी उंब्रज पोलिस ठाण्यात मुलीचे वडील, चुलते, भाऊ, आत्या यांच्यासह दहा जणांवर गुन्हा दाखल झाला आहे. यामध्ये चंद्रकांत लक्ष्मण कांबिरे, सुनील लक्ष्मण कांबिरे, ऋतुराज चंद्रकांत कांबिरे (सर्व रा. मसूर, ता. कऱ्हाड ) जयश्री मानसिंग निकम, स्वराज मानसिंग निकम, वैभव राजमाने (सर्व रा. तारगाव, ता. कोरेगाव ) व इतर चारजण यांचा समावेश आहे.याबाबत उंब्रज पोलिसांनी दिलेली माहिती अशी, रणजित चंद्रकांत पवार (वय २३ ) रा. अंधारवाडी ता. कऱ्हाड यांच्या फिर्यादीनुसार, मंगळवारी (दि. ५ ) रोजी रात्री आठ वाजण्याच्या सुमारास रणजित पवार हे राहत असलेल्या अंधारवाडी येथील घरात रणजित याची पत्नी दीक्षा हिचे वडील, चुलते, भाऊ, आत्या, आत्याचा मुलगा व त्याचे ५ मित्र गेले. रणजित व दीक्षा यांनी केलेल्या प्रेमविवाहाचा राग मनात धरून त्यांनी बेकायदेशीर जमाव जमवून रणजित पवारसह कुटुंबातील सर्वांना मारहाण केली. याबाबत उंब्रज पोलिस ठाण्यात गुन्हा नोंद झाला आहे. अधिक तपास सहायक पोलिस निरीक्षक रवींद्र भोरे करत आहेत.