जिल्ह्यात कोरोनाचे नवे १५९ रुग्ण

सातारा : जिल्ह्यात कोरोनाची रुग्णसंख्या वाढत असून, गत चोवीस तासांत मंगळवारी नवे १५९ रुग्ण आढळून आले. तसेच यामध्ये एकाही व्यक्तीचा मृत्यू न झाल्याने प्रशासनाला मोठा दिलासा मिळाला आहे. दरम्यान, बाधितांची संख्या ६२ हजार ५८५ वर पोहोचली आहे.

जिल्ह्यात गत महिनाभरापासून कोरोना रुग्णांची संख्या वाढत आहे. गत आठवड्यात तीनवेळा तीनशे पार रुग्णसंख्या झाली आहे. त्यामुळे प्रशासन आणखीनच चिंतेत पडले आहे. सोमवारी आलेला १३३ जणांच्या अहवालामध्ये चौघांचा मृत्यू झाला होता; मात्र मंगळवारी १५९ जणांचे अहवाल पॉझिटिव्ह आले. मात्र यामध्ये एकाचाही मृत्यू झाला नाही. त्यामुळे प्रशासनाला मोठा दिलासा मिळाला.

गतवर्षी असलेले कोरोनाचे हॉटस्पॉट यावर्षीही कायम आहेत. सातारा आणि फलटण तालुक्यामध्ये सर्वाधिक रुग्ण आढळून येत आहेत. त्यामुळे या दोन तालुक्यांवर जिल्हा प्रशासनाने विशेष लक्ष केंद्रित केले आहे. आरोग्य पथके ही त्या ठिकाणी तळ ठोकून आहेत.

जिल्ह्यात सध्या कोरोनाबाधितांची संख्या ६२ हजार ५८५ इतकी झाली आहे, तर बळींचा आकडा १ हजार ८८७ वर पोहोचला आहे. त्याचबरोबर आतापर्यंत ५८ हजार ३३६ रुग्ण कोरोनातून मुक्त झाले आहेत. त्यामुळे सध्या २ हजार ३३२ रुग्णावर विविध ठिकाणी उपचार सुरू आहेत.