संख येथे अपघातात तरुण ठार

फोटो ओळ : जत तालुक्यातील संख-दरीबडची रस्त्यावर माळी वस्तीजवळ दुचाकी व मालवाहू टेम्पो यांच्यात समोरासमोर धडक होऊन वाहनांचा चक्काचूर झाला.

लोकमत न्यूज नेटवर्क

संख : संख (ता. जत) येथे संख-दरीबडची रस्त्यावरील माळी वस्तीजवळ दुचाकी व मालवाहू टेम्पोमध्ये झालेल्या अपघातात तरुण ठार झाला. अप्पासाहेब शिवाजी शिंदे (वय ३२ वर्षे, रा. हरनाळ, ता. विजापूर, कर्नाटक) असे मृताचे नाव आहे. ही घटना शनिवारी रात्री ८ वाजता घडली. याबाबत उमदी पोलीस ठाण्यात नोंंद नाही.

अप्पासाहेब शिंदे हा पत्नी लक्ष्मीसह संख परिसरात ऊसतोडणीसाठी आला होता. शनिवारी काम संपवून तो संख-दरीबडची मार्गावरून आजीच्या गावी कोंतवबोबलाद येथे पतीसह दुचाकीवरून (क्र. के.ए. २८ ईव्ही ९७७९) जात होता. यावेळी मलावाहतूक टेम्पो (एम.एच -१० -बी.आर २४११) संखहून पांढरेवाडी येथे जात होता. यावेळी संख हद्दीत माळी वस्तीजवळ टेम्पो व दुचाकीची समोरासमोर धडक झाली. यात अप्पासाहेब शिंदे याच्या डोक्याला, पायाला मार लागून तो गंभीर जखमी झाला होता. पत्नी लक्ष्मी शिंदे हिच्या पायाला दुखापत झाली. अपघातानंतर स्थानिक नागरिकांनी १०८ रुग्णवाहिकेतून दोघांना उपचारासाठी मिरज सिव्हील रुग्णालयात पाठविले.

रविवारी उपचारादरम्यान पहाटे अप्पासाहेब शिंदे याचा मृत्यू झाला. घटनास्थळी समोरासमोर धडक होऊन पिकअप पलटी झाला आहे. तर, दुचाकी गाडीचा चक्काचूर झाला आहे. पुढचे चाक निखळून पडले आहे. याबाबतचा अद्याप उमदी पोलीस ठाण्यात गुन्हा नोंद नाही.

चाैकट

पोलिसांना माहिती

संख येथे अवघ्या दोन किलोमीटर अंतरावर पोलीस चौकी आहे. अपघात होऊन एकाचा मृत्यू व एक जखमी आहे. तरीसुद्धा पोलीस घटनास्थळी फिरकले नाहीत. घटनेचा पंचनामा झालेला नाही.