लिंगनूर येथील बिअरबार परमिटरूमला महिलांचा विरोध

लिंगनूर येथे १९७२ मध्ये तत्कालीन सरपंच दत्तात्रय मगदूम व स्व. मारूतीराव नलवडे यांनी दारू व बिअरबार परवाना न देण्याचा कायमस्वरूपी ठराव ग्रामसभेत घेतला होता. तेव्हापासून त्याचा अंमल सुरू होता. मात्र, गतवर्षी कोरोना काळात सर्व सदस्य व सरपंच यांचा कार्यकाल संपल्यानंतर ग्रामपंचायातीमध्ये प्रशासक नेमणूक झाली. याचा फायदा घेत गावातील नागरिकांना अंधारात ठेवत कोणालाही कल्पना न देता ग्रामसेवक आणि प्रशासक यांनी परस्पर बिअरबार परवानगीसाठी ग्रामपंचायतीकडून ना हरकत परवानगी दिली. आता नवीन ग्रामपंचायत सदस्यांनी मासिक बैठकीत अवैध बिअरबार आणि परमिट रूमला परवाना रद्द करण्याचे ठराव घेऊन मिरज ग्रामीण पोलीस ठाणे व राज्य उत्पादन शुल्क विभागास निवेदन दिले आहे. तसेच लिंगनूर येथील महिला व नागरिकांनी बिअरबार परवाना रद्द करण्याची मागणी केली आहे. नूतन महिला ग्रामपंचायत सदस्यांनी तहसील कार्यालयासमोर आंदोलन करण्याचा इशारा दिला आहे.

कोट

गावातील कोणत्याही व्यक्तीला कल्पना न देता प्रशासकाने बिअरबार परवान्यासाठी ना हरकत पत्र दिले आहे. यामुळे गावातील अनेक लोक व्यसनाधीन होतील. ग्रामपंचायतीकडून परवाना रद्द करण्यासाठी राज्य उत्पादन शुल्क विभागास ठराव दिला आहे. कोणत्याही परिस्थितीत परवाना रद्द करण्यात येईल.

- मारुती पाटील, सरपंच लिंगनूर