‘कृष्णा’तील चोरीमुळे तुरुंगात गेलेल्यांचा आदर्श काय घेणार?

लोकमत न्यूज नेटवर्क

शिरटे : कारखान्यात दिवसाढवळ्या चोरी केली म्हणूनच तुरुंगात जावे लागल्याचा आरोप कृष्णा बँकेचे अध्यक्ष डॉ. अतुल भोसले यांनी अविनाश मोहिते यांचे नाव न घेता केला. याचवेळी त्यांनी मोफत साखर, जयवंत आदर्श कृषी योजना व ऊस उत्पादकांना सर्वाधिक दर देऊनही कृष्णा कारखान्याची आर्थिक स्थिती भक्कम केल्याचेही सांगितले.

येडेमच्छिंद्र (ता. वाळवा) येथे शेतकरी सभासदांशी संवाद साधतेवेळी डॉ. भोसले बोलत होते. ‘कृष्णा’चे संचालक दयाभाऊ पाटील, व्ही.टी. पाटील, प्रकाश पाटील, महिपती पाटील, ॲड. संग्राम पाटील, अजित पाटील, गणेश हराळे, शहाजी पाटील, शिवाजी पाटील, जयसिंग पाटील, रणजित पाटील यांची प्रमुख उपस्थिती होती.

डॉ. भोसले म्हणाले, खुर्चीखाली नारळ ठेवून व होमहवन करून संस्था चालविता येत नाही. संस्थेशी प्रामाणिक राहून काम केले, तरच संस्था आर्थिक प्रगतीपथावर जाते असते. डॉ. सुरेश भोसले व त्यांच्या संचालक मंडळाने सभासद हित डोळ्यासमोर ठेवूनच अनेक धाडसी निर्णय घेतले. आज संस्था भक्कम आर्थिक प्रगतीपथावर आहे.

प्रकाश पाटील-रेठरेकर यांनी आभार मानले. यावेळी बाळासाहेब पाटील, प्रतापराव पाटील, डॉ. विश्वास पाटील, विश्वजित पाटील उपस्थित होते.