शिराळा पश्चिम भाग दुसऱ्या दिवशीही बंद

लोकमत न्यूज नेटवर्क

कोकरूड : शिराळा तालुक्याच्या पश्चिम भागात सलग दुसऱ्या दिवशी कोरोनाच्या प्रादुर्भावामुळे ‘ब्रेक द चेन’ अंतर्गत प्रमुख बाजारपेठांमध्ये कडकडीत बंद पाळण्यात आला. कोकरूड पोलीस स्टेशनने महत्त्वाच्या गावात बंदोबस्त ठेवला आहे.

शिराळा तालुक्याच्या पश्चिम भागात रुग्णसंख्या कमी असली तरी खबरदारीचा उपाय म्हणून प्रशासन आणि कोकरूड पोलिसांनी ‘ब्रेक द चेन’ या मोहिमेअंतर्गत शनिवार, रविवारी नागरिकांना घरी राहण्याचे आवाहन केले. कोकरुड पोलीस ठाण्याचे सहायक पोलीस निरीक्षक ज्ञानदेव वाघ स्वतः सहकाऱ्यांच्या बरोबरीने काम करत असून त्यांनी कोकरूड, शेडगेवाडी, चरण, आरळा, बिळाशी या महत्त्वाच्या गावांमध्ये बंदोबस्त ठेवला आहे.

विनाकारण सार्वजनिक ठिकाणी फिरणाऱ्या नागरिकांवर कारवाई करण्यात येत आहे. कोकरूड पोलीस ठाणे अंतर्गत असलेल्या सर्व गावांत लॉकडाऊनला व्यापारी, ग्रामस्थ, व्यावसायिकांना शंभर टक्के सहकार्य मिळत आहे. रुग्णालये, औषध दुकाने, कृषी दुकाने, मांस विक्री दुकाने, दूध वितरण व्यवस्था या जीवनावश्यक वस्तूंची दुकाने सोशल डिस्टन्सिंग ठेवत सुरू आहेत.