कामेरी परिसरातील दिव्यांगांना सर्वतोपरी सहकार्य करू

कामेरी : कामेरी परिसरातील दिव्यांग बांधवांना कृषिभूषण जगदीश पाटील आप्पा दिव्यांग संस्थेच्या माध्यमातून शासनाच्या विविध योजनांचा लाभ मिळवून देण्यासाठी सहकार्य करू व त्यांचा आर्थिक, सामाजिक स्तर उंचावण्यासाठी सर्वतोपरी प्रयत्न करू, असे प्रतिपादन जिल्हा परिषदेचे माजी उपाध्यक्ष रणजित पाटील यांनी केले.

कामेरी (ता. वाळवा) येथे कृषिभूषण जगदीश पाटील आप्पा दिव्यांग पुनर्वसन, सल्ला व मार्गदर्शन केंद्राच्या उद‌्घाटनप्रसंगी ते बोलत होते. जागतिक अपंग दिनानिमित्त लोकनेते राजारामबापू पाटील मल्टिपर्पज डेव्हलपमेंट सोसायटी संलग्न दिव्यांग पुनर्वसन, सल्ला व मार्गदर्शन केंद्राची कामेरी येथे स्थापना करण्यात आली. या कार्यक्रमास संग्राम जगदीश पाटील, जयंत दारिद्र्य निर्मूलनचे समन्वयक इलियास पिरजादे, संजय कटारे, ग्रामपंचायत सदस्य इम्रान संदे, शब्बीर मुल्ला उपस्थित होते.

यावेळी नूतन केंद्राचे अध्यक्ष दिनकर भोसले, उपाध्यक्ष सागर फोंडे, सचिव अस्लम संदे, खजिनदार जालिंदर सावंत व सदस्य अनिकेत पाटील, वसंत पाटील, वसंत माने, अफझल पिरजादे, सुधीर पेठकर, मनीषा माने, सविता फोंडे या नूतन पदाधिकाऱ्यांचा सत्कार करण्यात आला. मारुती पाटील यांनी स्वागत केले. किरण खोत यांनी सूत्रसंचालन केले. दिनकर भोसले यांनी आभार मानले.

फोटो : ०४ कामेरी १

ओळी : कामेरी (ता. वाळवा) येथे कृषिभूषण जगदीश पाटील यांना रणजित पाटील, संग्राम पाटील, दिनकर भोसले, सागर फोंडे, अस्लम संदे यांनी अभिवादन केले.