वैष्णवी मार्केटिंगचा चार हजारांवर ग्राहकांना गंडा

कार्यालय बंद : ठकसेन प्रमोद साळुंखे बेपत्ता

भिलवडी : ‘साडेपाचशे रुपयांत मारुती मोटारीचे धनी व्हा’, ‘खुशियोंके रंग वैष्णवी मार्केटिंगके संग’, ‘इनाम का हकदार हर खरीददार’ अशा फसव्या जाहिरातबाजीने सामान्यांना भुरळ घालणाऱ्या रेठरधरण (ता. कऱ्हाड) येथील प्रमोद साळुंखे याच्या मालकीच्या वैष्णवी मार्केटिंग या कंपनीने पलूस तालुक्यातील चार हजारांवर ग्राहकांना गंडा घातल्याचे शनिवारी स्पष्ट झाले. पलूस येथील जिल्हा परिषद शाळेजवळच्या कार्यालयाचा गाशा चार दिवसांपासून कंपनीने गुंडाळला.
आमणापूर (ता. पलूस) येथील समीर आदम सुतार मारुती अल्टो मोटारीचे विजेते ठरूनही त्यांना बक्षीस न मिळाल्याने हा प्रकार उघडकीस आला असून, कंपनीने ग्राहकांना सव्वाकोटीवर रकमेचा गंडा घातल्याची चर्चा तालुक्यात आहे. पलूससह आमणापूर, धनगाव, माळवाडी, भिलवडी, अंकलखोप, नागठाणे, बांबवडे, कुंडल, बुरूंगवाडी, भिलवडी स्टेशन, वसगडे, आदी गावांतील ग्राहकांना ३३०० रुपये भरून कोणतीही भेटवस्तू मिळाली नसल्याचा प्रकार उघडकीस आला आहे.
वैष्णवी मार्केटिंग या कंपनीने सांगली, कोल्हापूर, सातारा या जिल्ह्यांतील विविध तालुक्यांची ठिकाणे आणि मोठी बाजारपेठ असणाऱ्या गावांमध्ये स्थानिक एजंटांना हाताशी धरले. आलिशान कार्यालये थाटून हप्त्याने घरगुती वस्तू विक्रीच्या नावाखाली लकी ड्रॉ सुरू केला. बारा आठवड्यांची मुदत असणाऱ्या या योजनेमध्ये आठवड्याला ५५० रुपये असे एकआड एक आठवड्यास सहा हप्ते भरावयाचे होते. पहिले चार आठवडे टीव्ही, फ्रीज, मोटारसायकल, स्कूटी, लॅपटॉप, शिलाई मशीन अशा १६ बक्षिसांचे विजेत्यांना वाटप केले गेले. २१ मे अखेर कंपनीने पलूस येथे सर्व ड्रॉ काढले; पण पाचव्या ड्रॉपासून बाराव्या ड्रॉअखेर कोणालाच बक्षिसे दिली गेली नाहीत. आमणापूर येथील समीर सुतार यांना मारुती अल्टो मोटार लागल्याचे दूरध्वनीवरून सांगण्यात आले. साध्या कागदावर संगणकावर टाईप केलेले जा. क्र. २/१४४८ या क्रमांकाचे २६ मे २०१५ रोजीचे पत्र देण्यात आले.
यामध्ये ‘समीर ए. सुतार यांना मारुती अल्टो देण्यात यावी’, असा मजकूर आहे. सुतार रेठरे बुद्रुक येथील संस्थेच्या गोदामामध्ये गेले असता, गाडी कंपनीकडून येणार असल्याचे सांगण्यात आले. त्यानंतर त्यांनी बरेच हेलपाटे मारले, पण केवळ आश्वासनेच मिळाली. चार दिवसांपूर्वी ते पुन्हा गोदामाला भेट देण्यासाठी गेले, त्यावेळी वस्तूंनी भरलेले गोदाम पूर्णपणे रिकामे असल्याचे दिसले. प्रमोद साळुंखेची घरी जाऊन चौकशी केली असता, तो गावामधून बेपत्ता झाला असून, त्याच्या भावाने रेठरे बु्रद्रुकच्या पोलीस ठाण्यात तक्रार केली असल्याचे समजले. त्यानंतर त्यांनी पलूसमधील गोरंबेकर व मुल्ला या दोन शाखाधिकाऱ्यांशी संपर्क साधण्याचा प्रयत्न केला असता, दोघांचेही मोबाईल बंद होते. पलूसमधील जिल्हा परिषद शाळेसमोरील प्रशांत बिल्डिंगमधील कार्यालयाला टाळे ठोकलेले दिसले. कंपनीने नावाचे फलक काढून सर्व साहित्यासह गाशा गुंडाळला आहे. याबाबत सुतार यांच्यासह फसवणूक झालेले चार हजारांवर ग्राहक पलूस पोलीस ठाण्यात गुन्हा दाखल करण्याच्या तयारीत आहेत. महसूल व पोलीस खात्याने असे बेकायदेशीर लकी ड्रॉ चालविणाऱ्या बोगस कंपन्यांवर कायदेशीर कारवाई करावी, अशी मागणी जोर धरत आहे. (वार्ताहर)