सांगलीत दिवसभरात ६०० जणांचे लसीकरण

सांगली : महापालिकेने ज्येष्ठ नागरिक व सहव्याधी व्यक्तींसाठी दहा आरोग्य केंद्रांतून कोविड लसीकरणाची सोय केली आहे. शुक्रवारी दिवसभरात ५३८ ज्येष्ठ नागरिक आणि ७१ सहव्याधी व्यक्तींचे कोरोना लसीकरण करण्यात आले. शहरातील अनेक मान्यवरांनीही कोरोनाची लस घेतली.

महापालिका क्षेत्रात ज्येष्ठ नागरिकांच्या कोविड लसीकरणास सोमवारपासून सुरुवात झाली. शहरात ७३ हजार ५५७ ज्येष्ठ नागरिक, तर ३२ हजार ३५८ सहव्याधी नागरिक आहेत. महापालिकेने दहा आरोग्य केंद्रांवर लसीकरणाची सोय उपलब्ध करून दिली आहे. आरोग्य केंद्रामध्ये सकाळी ९ ते सायंकाळी ४ या वेळेत लसीकरण करण्याची सोय आहे. जागेवरच ऑनलाइन नोंदणी करून तत्काळ लसीकरण केले जात आहे.

या लसीकरणाला महापालिका क्षेत्रात उत्स्फूर्त प्रतिसाद मिळत आहे. शुक्रवारी ६०० जणांचे लसीकरण झाले. आभाळमाया फौंडेशनचे आर्किटेक्ट प्रमोद चौगुले, उद्योजक श्रीकांत तारळेकर, रेड स्वस्तिक सोसायटीच्या पदाधिकाऱ्यांनी शुक्रवारी लस घेतली. ही लस सुरक्षित असून, त्याचा कोणताही त्रास होत नाही. त्यामुळे ज्येष्ठ नागरिकांनी लसीकरण करून घ्यावे, असे आवाहनही प्रमोद चौगुले यांनी केले. यावेळी रेड स्वस्तिक सोसायटीचे स्वयंसेवकही उद्यापासून आरोग्य केंद्रावर कर्मचाऱ्यांच्या मदतीसाठी येणार असल्याचे सांगण्यात आले.