सांगलीत दोन दुकानदारांना दंड

लोकमत न्यूज नेटवर्क

सांगली : लॉकडाऊनच्या नियमांचे उल्लंघन केल्याप्रकरणी महापालिकेने दोन दुकानांवर कारवाई करत २० हजार रुपयांचा दंड केला तसेच भाजी मंडईत विनामास्क फिरणाऱ्या १३ जणांवर दंडात्मक कारवाई करण्यात आली.

आयुक्त नितीन कापडणीस यांनी लाॅकडाऊनच्या नियमांचे उल्लंघन करण्यावर कारवाई करण्याचे आदेश प्रशासनाला दिले आहेत. महापालिका व पोलिसांच्या संयुक्त पथकाकडून सध्या कारवाईचा धडाका सुरू आहे. शुक्रवारी शहरात दोन दुकानदारांनी संचारबंदीच्या नियमांचे उल्लंघन केल्याचे आढळून आले. दुकानदाराला प्रत्येकी दहा हजारांचा दंड करण्यात आला. पेठभाग येथील भाजीमंडईत विनामास्क फिरणाऱ्या १३ जणांकडूनही दंड वसूल करण्यात आला. सहायक आयुक्त अशोक कुंभार, शहर पोलीस निरीक्षक अजय सिंदकर, स्वच्छता निरीक्षक धनंजय कांबळे, किशोर कांबळे व प्रणिल माने यांनी ही कारवाई केली.

चौकट

नियमांचे पालन न केल्यास कारवाई : आयुक्त कापडणीस

कोरोना रुग्णांची संख्या वाढत आल्याने शासनाने जाहीर केलेल्या लॉकडाऊन नियमांचे सर्वांनी पालन करावे. सकाळी ७ ते ११ या कालावधीत शासनाने परवानगी दिलेले व्यवसाय सुरू ठेवावेत. या नियमांचे अनेक आस्थापना उल्लंघन करताना आढळून येत असून त्यांच्यावर महापालिका आणि पोलिसांच्या पथकाकडून दंडात्मक कारवाई केली जात आहे. त्यामुळे सर्वच आस्थापनांनी शासनाच्या आदेशाचे पालन करावे अन्यथा कारवाई केली जाईल, असा इशारा आयुक्त नितीन कापडणीस यांनी दिला.