विकासाची चेन्नई एक्स्प्रेस धावण्यासाठी प्रयत्नशील

विटा : विटा शहरातील रेवानगर, पंचशीलनगरसह अन्य उपनगरांत नागरिकांच्या जिव्हाळ्याचा प्रश्न सुटला पाहिजे. पालखी मार्ग आणि रेवानगर परिसराचा विकास व्हावा, अशी या भागातील लोकांची इच्छा आहे. त्यामुळे आगामी काळात विटा शहरासह विविध उपनगरांत विकासाची चेन्नई एक्स्प्रेस धावण्यासाठी प्रयत्न करणार असल्याची ग्वाही आ. अनिल बाबर यांनी दिली.

विटा येथील राष्ट्रवादी काँग्रेसचे प्रदेश प्रतिनिधी माजी आ. सदाशिवराव पाटील यांचे समर्थक माजी नगरसेवक सीतारामशेठ बुचडे यांनी शुक्रवारी राष्ट्रवादी काँग्रेसला रामराम ठोकून शिवसेना पक्षात प्रवेश केला. त्याप्रसंगी आयोजित कार्यक्रमात आ. बाबर बोलत होते. यावेळी जिल्हा परिषदेचे माजी उपाध्यक्ष सुहास बाबर, नगरसेवक अमर शितोळे, माजी नगराध्यक्ष नंदकुमार पाटील, उत्तम पवार, रामचंद्र भिंगारदेवे, उत्तम चोथे उपस्थित होते.

आ. बाबर म्हणाले, कोणाला तरी कमीपणा यावा, यासाठी आम्ही असे कार्यक्रम घेत नाही. २०१४ ला मी हातात शिवबंधन बांधले. त्याचा रंग उडाला, मात्र गाठ ढिली झाली नाही. या भागातील शेतीच्या पाण्यासाठी टेंभू योजनेचा सहावा टप्पा व्हावा, यासाठी मी पाठपुरावा करीत आहे. येत्या काही कालावधित हे काम पूर्ण होईल. त्यामुळे परिसरात हरितक्रांतीचे नवे पर्व सुरू होण्यास मदत होणार आहे.

यावेळी माजी नगरसेवक सीताराम बुचडे यांनी आगामी काळात आ. अनिल बाबर यांचे नेतृत्व मानून त्यांच्या पाठीशी ठामपणे उभा राहणार असल्याचे सांगितले. यानंतर आ. बाबर यांनी शिवसेना पक्षात प्रवेश करणारे सीताराम बुचडे यांच्यासह पंचशीलनगर, रेवानगर उपनगरांतील असंख्य कार्यकर्त्यांच्या हातात शिवबंधन बांधून त्यांचे पक्षात स्वागत केले. यावेळी ईश्वरशेठ जाधव, सोमनाथ सुळे, नीलेश गुरव, अनिल औताडे, विजय संकपाळ, अनिल हराळे, प्रकाश पवार, नारायण पवार, दामोदर पवार, मुकुंद लकडे यांच्यासह कार्यकर्ते उपस्थित होते.

फोटो - ०२०१२०२१-विटा-शिवसेना : विटा येथील राष्ट्रवादी काँग्रेसचे माजी नगरसेवक सीताराम बुचडे यांनी शिवसेनेत प्रवेश केल्यानंतर त्यांचा आ. अनिल बाबर यांच्याहस्ते सत्कार करण्यात आला.